काठमाडौँ । करका दर हेरफेर गर्न बाहिरिया बिचौलिया प्रयोग गरेको प्रकरणमा मुछिएका जनार्दन शर्माले मंगलबार नै राजिनामा दिने कुरा थियो । यसो त प्रधानमन्त्री निकटहरु नै आज अर्थमन्त्रीको राजिनामा आउँछ भन्दै हिंडेका थिए । तर बुधबार रातीसम्म पनि अर्थमन्त्रीको राजिनामा नआएपछि राजिनामा किन आएन भनेर धेरैले प्रश्न गरिरहेका छन् ।
स्रोतका अनुसार खासमा मंगलबार बसेको मन्त्रीपरिषद बैठकमा पनि शर्माको राजिनामा मागिएको थियो । बैठकपछि प्रधानमन्त्री देउवाले पनि अर्थमन्त्रीलाई राजिनामा बारे सोधेका थिए । अर्थमन्त्रीले परेको व्यहोर्ने तर राजिनामा नदिने बताएपछि देउवा ‘अव हुँदैन, प्रचण्डसँग कुरा गर्छु’ भन्दै उनीसँग छुटेका थिए ।
नभन्दै प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच साँझ बालुवाटारमा भेटघाट भएको छ ।स्रोतका अनुसार झण्डै सवा ६ बजेको हाराहारीमा प्रधानमन्त्रीको सरकारी निवास बालुवाटारमा भएको छलफलमा पनि अर्थमन्त्री शर्माकै बारे बढी कुरा भएको थियो ।
छलफलका क्रममा प्रचण्ड पनि शर्मालाई फिर्ता बोलाउन आफु तयार भएको बुझिएको छ । ‘प्रचण्डले पनि अर्थमन्त्री शर्मालाई फिर्ता बोलाउने कुरा गर्नुभएको छ । सम्भवत: बुधबार अर्थमन्त्रीको राजिनामा आउनेछ।’