काठमाडौं । नेपाल राष्ट्र बैंकका डेपुटी गभर्नर बम बहादुर मिश्रले आगामी आर्थिक वर्षको मौद्रिक नीति एक साताभित्रै आउने बताएका छन् । बुधबार चार्टर्ड एकाउन्टेन्स् संघले आयोजना गरेको मौद्रिक नीति सम्बन्धि प्यानल डिस्कसन कार्यक्रममा डेपुटी गभर्नरले मौद्रिक नीति जारी गर्ने अन्तिम अवस्थामा पुगेको बताएका हुन् ।

सरोकारवाला निकायहरुको सुझावलाई समेत समेटेर मौद्रिक नीति ल्याउने तयारी भइरहेको उनले बताएका छन् । अर्थतन्त्रलाई सम्हाल्ने मौद्रिक नीति ल्याउन लागेको उनले बताएका छन् ।

उनले भने, ‘अहिले राष्ट्र बैंक मौद्रिक नीतिको तयारीमा तिब्र रुपमा लागेको छ, अहिले हामी मौद्रिक नीति निर्माणको अन्तिम चरणमा छौँ’ । ‘सबै तह र तप्काबाट आएका सुझावहरूलाई समेटेर अर्थतन्त्रलाई सम्हाल्ने मौद्रिक नीति ल्याउँनेछौँ’ ।

मौद्रिक नीति अन्तिम समयमा पुगिसकेकाले लिखित सुझाव चाँडै पठाउन समेत एक्यानलाई उनले आग्रह गरेका छन् । एक्यानको कार्यक्रममा गभर्नर महाप्रसाद अधिकारी जाने तय भए पनि अन्तिम अवस्थामा डेपुटी गभर्नर मिश्र पुगेका थिए ।