काठमाडौं । सिटिजन्स बैंकको खुद नाफामा २४.७६ प्रतिशतले वृद्धि भएको छ । गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गर्दै बैंकले २ अर्ब २५ करोड ११ लाख रुपैँया खुद नाफा कमाएको जानकारी दिएको छ । अघिल्लो आर्थिक वर्षको सोही अवधिसम्म बैंकको खुद नाफा बैंकले १ अर्ब ८० करोड ४३ लाख रुपैयाँ रहेको थियो ।
त्यस्तै बैंकको खुद ब्याज आम्दानी भने ४०.२९ प्रतिशतले वृद्धि भएको छ । बैंकको कमिसन आम्दानी १५.५७ प्रतिशत बढेको र कुल सञ्चालन आम्दानी २८.५० प्रतिशत र सञ्चालन मुनाफा २४.९४ प्रतिशतले बढेको बैंकले जारी गरेको विवरणमा उल्लेख गरिएको छ । बैंकले सार्वजनिक गरेको विवरण अनुसार आर्थिक वर्षको अन्त्यसम्ममा बैंकको वितरण योग्य मुनाफा १ अर्ब ४२ करोड ४६ लाख रुपैयाँ रहेको छ ।
नाफासँगै बैंकको प्रतिशेयर आम्दानी (ईपीएस) पनि बढेको छ । गत आर्थिक वर्षको चौथो त्रैमाससम्ममा बैंकको यस्तो आम्दानी १ रुपैयाँ ५१ पैसा बढेर १५ रुपैयाँ ८५ पैसा पुगेको छ। सो अवधिसम्ममा बैंकको मूल्य आम्दानी अनुपात १२.७७ गुणा रहेको छ भने प्रतिशेयर नेटवर्थ १४५ रुपैयाँ ३९ पैसा रहेको छ । त्यस्तै सोही अवधिसम्ममा बैंकको चुक्ता पूँजी १२.९१ प्रतिशत बढेको छ भने जगेडा कोष २.१३ प्रतिशत बढेको छ । बैंकको निक्षेप ८.६५ प्रतिशत र कर्जा १०.६८ प्रतिशत बढेको विवरणमा उल्लेख गरिएको छ ।
