काठमाडौं । राप्ती हाइड्रो एन्ड जनरल कन्स्ट्रक्सनको आइपीओ बिक्री खुला भएको छ । कम्पनीले असार २९ गते बुधबार (आज)बाट सर्वसाधारणका लागि आइपीओ बिक्री खुला गरेको हो । कम्पनीले २३ करोड ६६ लाख २४ हजार  बराबरको २३ लाख ६६ हजार २४० कित्ता आइपीओ बिक्री खुला गरेको छ ।

कम्पनीले यसअघि स्थानीय बासिन्दालाई जारी गर्दा बिक्री नभएको ३७ हजार ६३२ कित्ता सेयर पनि थप गरेर आइपीओ बिक्रीमा ल्याएको हो । यसमध्ये १ लाख १८ हजार ३१२ कित्ता सामूहिक लगानी कोष र ७० हजार ९८८ कित्ता सेयर कर्मचारीहरुका लागि छुट्याइएको छ । बाँकी २१ लाख ७६ हजार ९४० कित्ताका लागि सर्वसाधारणले आवेदन दिन सक्नेछन् । यसमा साउन १ गतेसम्म आवेदन दिन सकिनेछ ।

त्यस अवधिमा सबै सेयर बिक्री नभएमा साउन ११ गतेसम्म सेयर भर्न सक्ने कम्पनीको भनाई छ । लगानीकर्ताले यसमा न्यूनतम १० कित्तादेखि अधिकतम २१ लाख कित्ताका लागि आवेदन दिन सक्नेछन् । यसमा सिद्धार्थ क्यापिटलले बिक्री प्रबन्धकको काम गरेको छ । लगानीकर्ताले सी–आस्वा प्राप्त बैंक तथा वित्तीय संस्था तथा मेरो सेयरमार्फत सेयर भर्न सक्ने कम्पनीले जनाएको छ ।