काठमाडौं । माछापुच्छ्रे बैंकको खुद ब्याज आम्दानी र सञ्चालन मुनाफा बढेसँगै खुद नाफामा ३४.४३ प्रतिशतले वृद्धि भएको छ । बैंकले गत आर्थिक वर्षको चौथो त्रैमाससम्मको वित्तीय विवरण सार्वजनिक गर्दै अघिल्लो वर्षको भन्दा ३४ प्रतिशत बढी खुद नाफा कमाएको जनाएको छ ।
बैंकले गत आर्थिक वर्षको अन्त्यसम्मा २ अर्ब १६ करोड ९ लाख खुद नाफा कमाएको छ । अघिल्लो वर्ष बैंकको सोही अवधिमा खुद नाफा १ अर्ब ६० करोड ७४ लाख रुपैयाँ कमाएको थियो । बैंकले प्रकाशित गरेको गत आर्थिक वर्षको अन्त्यसम्मको अपरिष्कृत विवरण अनुसार बैंकमा अघिल्लो आर्थिक वर्षको तुलनामा उल्लेख्य सुधार भएको देखिएको छ ।
बैंकको खुद ब्याज आम्दानी १६.६७ प्रतिशत र खुद फि तथा कमिसन आम्दानीमा १४.९५ प्रतिशतले वृद्धि भएको छ । त्यस्तै बैंकको कुल सञ्चालन आम्दानी १२.९० प्रतिशत बढ्दा सञ्चालन मुनाफा २६.७५ प्रतिशत बढेको छ । इम्पेरमेन्ट चार्ज घटेसँगै खुद ब्याज आम्दानीको तुलनामा सञ्चालन मुनाफा धेरै बढ्न पुगेको बैंकको प्रक्षेपण रहेको छ । असार मसान्तसम्ममा बैंकको वितरण योग्य मुनाफा १ अर्ब ३२ करोड ८४ लाख रुपैयाँ रहेको छ । नाफासँगै बैंकको प्रतिशेयर आम्दानी (ईपीएस) पनि बढेको छ । समीक्षा अवधिमा बैंकको ईपिएस ३ रुपैयाँ ३१ पैसा बढेर २१ रुपैयाँ ७ पैसा पुगेको छ । सो अवधिसम्ममा बैंकको मूल्य आम्दानी अनुपात १२.०६ गुणा रहेको छ भने प्रतिशेयर नेटवर्थ १४५ रुपैयाँ ७० पैसा रहेको छ ।
त्यस्तै गत आर्थिक वर्षको अन्त्यसम्ममा बैंकको चुक्ता पूँजी १३.३० प्रतिशत बढेको छ । जगेडा कोषमा २२.९० प्रतिशतले वृद्धि भएको छ भने बैंकको निक्षेप १०.१९ प्रतिशत र कर्जा १३.२० प्रतिशत बढेको छ ।
