तनहुँ । तनहुँ आन्तरिक राजस्व कार्यालयले लक्ष्यको १०१ दशमलव ६५ प्रतिशत राजस्व सङ्कलन गर्न सफल भएको छ । कार्यालयले आर्थिक वर्ष २0७८/७९ मा लक्ष्यभन्दा बढी राजस्व सङ्कलन गरेको हो ।उक्त आर्थिक वर्षमा लक्ष्यभन्दा रु. १५ करोड पाँच लाख ७६ हजार बढी राजस्व सङ्कलन भएको कार्यालयका प्रमुख कर अधिकृत डा. नारायण ढकालले जानकारी दिए । कार्यालयले यो अवधिमा रु. नौ अर्ब २४ करोड ९२ लाख चार हजार राजस्व सङ्कलन गरेको छ । यो वर्ष रु. नौ अर्ब नौ करोड ८६ लाख २८ हजार राजस्व सङ्कलन गर्ने लक्ष्य थियो । गत आर्थिक वर्ष २0७७/७८ मा कार्यालयले रु. आठ अर्ब ५० करोड २६ लाख ६१ हजार राजस्व सङ्कलन गरेको थियो । उक्त आर्थिक वर्षमा रु. आठ अर्ब ५६ करोड ६८ लाख ३७ हजार राजस्व सङ्कलन गर्ने लक्ष्य थियो । गत वर्ष लक्षभन्दा केही कम राजस्व सङ्कलन भए पनि यो वर्ष लक्ष्यभन्दा बढी राजस्व सङ्कलन भएको ढकालले बताए ।

कार्यालयले यस अवधिमा आयकरतर्फ रु. ६५ करोड ४७ लाख १५ हजार, घरबहाल करतर्फ रु. एक करोड ८६ लाख ८१ हजार, ब्याजतर्फ रु. चार करोड ६७ लाख ८७ हजार, मूल्यअभिवृद्धितर्फ रु. ४५ करोड ७५ लाख ५९ हजार राजस्व सङ्कलन भएको छ । अन्तशुल्कतर्फ रु. छ अर्ब १७ करोड ५ लाख २१ हजार, स्वास्थ्यतर्फ रु. एक अर्ब ९० करोड नौ लाख ३७ हजार र शिक्षातर्फ रु. पाँच हजार राजस्व सङ्कलन भएको छ । आयकरतर्फ रु. ७१ करोड ६१ लाख ४१ हजार, घरबहाल करतर्फ रु. ५६ करोड ६८ लाख चार हजार, ब्याजतर्फ रु. एक अर्ब आठ करोड १३ लाख नौ हजार, मूल्यअभिवृद्धि करतर्फ रु. ६१ करोड ६१ लाख १२ हजार, अन्तशुल्कतर्फ रु. छ अर्ब ४४ करोड दुई लाख ११ हजार, स्वास्थ्यतर्फ रु. एक अर्ब १५ करोड ७९ लाख १७ हजार र शिक्षातर्फ ३४ लाख २५ हजार राजस्व सङ्कलन गर्ने लक्ष्य थियो ।

आयकरतर्फ लक्षको ९१ दशमल ४२, घरबहाल करतर्फ ३२ दशमलव ९६, व्याजतर्फ ४३ दशमलव २७, मूल्यअभिवृद्धि करतर्फ ७४ दशमलव २७, अन्तशुल्कतर्फ ९५ दशमलव ८१, स्वास्थ्यतर्फ १६४ दशमलव १७ र शिक्षातर्फ शुन्य दशमलव १४ प्रतिशत राजस्व सङ्कलन भएको छ । कार्यालयका अनुसार असार महिनामा मात्रै रु. ८५ करोड ७९ लाख ७४ हजार राजस्व सङ्कलन गरेको जनाइएको छ । असार महिनामा मात्रै लक्षको १३५ दशमलव २४ प्रतिशत बढी राजश्व सङ्कलन भएको थियो । असार महिनामा रु. ६३ करोड ४४ लाख २५ हजार राजस्व सङ्कलनको लक्ष्य राखिएको थियो । कार्यालयले तनहुँसहित लमजुङ, गोरखा र मनाङको असूली गणना, लेखापरीक्षण र अनुसन्धानको काम गर्दै आएको छ । विगत दुई वर्षदेखि गोरखा र लमजुङमा करदाता सेवा कार्यालय स्थापना भएको छ । मनाङका करदाताले लमजुङबाट कर तिर्न सक्ने व्यवस्था मिलाइएको छ । उक्त दुई जिल्लामा करदाता सेवा कार्यालय नहुँदा त्यहाँका करदाताले पनि दमौलीमै आएर कर तिर्नुपर्ने बाध्यता थियो ।