काठमाडौँ । आर्थिक संकटले थिलोथिलो भएको श्रीलंकामा अहिले इन्धनको चरम अभाव छ । इन्धनको संचिति कम भएको भन्दै त्यहाँको लङ्का इन्डियन आयल कम्पनी (LIOC) ले केहि दिन अगाडीदेखि इन्धन वितरण बन्द गरेको थियो । तर आन्दोलनको आँधीबेरीले सत्ता नै ढल्ने स्थितिमा रहेको श्रीलंकाले जनदबाब थेग्न नसकेर इन्धन वितरण सुचारु गरेको छ । त्यहाँको त्रिन्कोमाली टर्मिनल २४ सै घण्टा इन्धन वितरण हुने कम्पनीले जनाएको छ ।

यस्तै इन्धन अभावकै कारण बन्द भएका बस सेवा र रेल सेवा पनि संचालनमा आएका छन् । आइतबार विहानदेखि रेल सेवा संचालनमा आएको त्यहाँको रेल विभागले जनाएको छ । रेल विभागले रेल सेवा संचालन गरेसँगै त्यहाँका यात्रुहरुले रेलबाट यात्रा गर्न सुरु गरेका छन् । यसैबीच, आन्दोलनका कारण सत्ता नै पल्टिने भएपछि श्रीलंका यातायात बोर्ड (एसएलटीबी) ट्रेड युनियनले सुरु गरेको हडताल पनि फिर्ता लिइएको छ।