काठमाडौं । स्ट्याण्डर्ड चार्टर्ड बैंक लिमिटेडको खुद नाफामा ६२.२७ प्रतिशतले वृद्धि भएको छ । बैंकले सार्वजनिक गरेको अपरिष्कृत वित्तीय विवरण अनुसार बैंकले अघिल्लो आर्थिक वर्षका तुनालामा आधाभन्दा बढी नाफा भएको छ ।
अघिल्लो आर्थिक वर्षको समिक्षा अवधीसम्म बैंकको खुद नाफा १ अर्ब ३९ करोड ८८ लाख रुपैँया रहेको थियो । जबकी गत आर्थिक वर्षको सोही अवधिमा बैंकको सो नाफामा ६२.२७ प्रतिशतले वृद्धि भई कुल खुद नाफा २ अर्ब २६ करोड ९८ लाख रुपैयाँ पुगेको छ । बैंकका अनुसार खुद ब्याज आम्दानी र सञ्चालन मुनाफामा वृद्धि भएसँगै इम्पेरमेन्ट चार्ज घट्नुले बैंकको नाफामा वृद्धि गरेको हो ।
त्यस्तै बैंकको खुद ब्याज आम्दानी ४४.८६ प्रतिशतले वृद्धि भएको छ । खुद फि तथा कमिसन आम्दानी ३३.१९ प्रतिशतले वृद्धि हुँदा बैंकको कुल सञ्चालन आम्दानी ३१.६७ प्रतिशत र सञ्चालन मुनाफामा ६१.५४ प्रतिशतले बढोत्तरी भएको छ । गत आर्थिक वर्षका अन्त्यसम्ममा बैंकको वितरणयोग्य मुनाफा १ अर्ब ५९ करोड ३६ लाख रुपैयाँ रहेको छ । त्यस्तै बैंकको प्रतिशेयर आम्दानी (ईपीएस) पनि बढेको छ । बैंकको यस्तो आम्दानी ७ रुपैयाँ ७५ पैसा बढेर २४ रुपैयाँ ७ पैसा पुगेको छ । समिक्षा अवधिसम्ममा बैंकको मूल्य आम्दानी अनुपात १६.४६ गुणा रहेको छ भने प्रतिशेयर नेटवर्थ १९२ रुपैयाँ रहेको छ ।
समीक्षा अवधिमा बैंकको चुक्ता पूँजी १० प्रतिशत बढेको छ भने जगेडा कोष १३.४० प्रतिशत बढेको छ । त्यसैगरी, बैंकको निक्षेप ६.९२ प्रतिशत र कर्जा २६.८६ प्रतिशत बढेको छ ।
