काठमाडौं । सनराइज बैंक लिमिटेडले गत आर्थिक वर्षको अन्त्यसम्ममा खुद नाफामा उल्लेख्य सुधार गरेको छ । बैंकले गत आर्थिक वर्षको चौथो त्रैमाससम्मको अपरिष्कृत वित्तीय विवरण सार्वजनिक गर्दै अघिल्लो आर्थिक वर्षको तुलनामा ४८.६९ प्रतिशत बढी खुद नाफा कमाएको जनाएको छ ।

अघिल्लो आर्थिक वर्षको चौथो त्रैमाससम्म बैंकको खुद नाफा १ अर्ब ४४ करोड ६५ लाख रहेको थियो । गतवर्ष भने बैंकको सो आंकडामा ४८.६९ प्रतिशतले वृद्धि भई बैंकको कुल खुद नाफा २ अर्ब १५ करोड ९ लाख पुगेको छ । बैंकले गैर सञ्चालन खर्च घटेका कारण बैंकको नाफामा उल्लेख्य बढोत्तरी भएको प्रक्षेपण गरेको छ ।

गत आर्थिक वर्षमा बैंकको खुद ब्याज आम्दानी २९.९७ प्रतिशत बढेको छ । खुद फि तथा कमिसन आम्दानीमा भने ३.४१ प्रतिशतले गिरावट आएको छ । त्यस्तै बैंकको कुल सञ्चालन आम्दानी २१.५६ प्रतिशत र सञ्चालन मुनाफा १९.९० प्रतिशत बढेको छ । इम्पेरमेन्ट चार्ज बढेसँगै सञ्चालन मुनाफामा केही दबाब परेको हो। असार मसान्तसम्ममा बैंकको वितरण योग्य मुनाफा २५ करोड ६१ लाख रुपैयाँ रहेको छ ।

नाफासँगै बैंकको प्रतिशेयर आम्दानी (ईपीएस)मा पनि ६ रुपैँया १ पैसाले वृद्धि भएको छ । समीक्षा अवधिमा बैंकको ईपिएस २१ रुपैयाँ २६ पैसा पुगेको छ । बैंकको मूल्य आम्दानी अनुपात ९.७४ गुणा रहँदा प्रतिसेयर नेटवर्थ १६५ रुपैयाँ २९ पैसा रहेको छ । समीक्षा अवधिमा बैंकको चुक्ता पूँजी ६.६५ प्रतिशत बढेको छ भने जगेडा कोष २५.०८ प्रतिशत बढेको छ । त्यसैगरी, बैंकको निक्षेप २३.६५ प्रतिशत र कर्जा १९.५६ प्रतिशत बढेको छ ।