काठमाडौं । काठमाडौंको न्युरोडस्थित नबिल बैंकले बेसमेन्टमा बनाएको शाखा कार्यालय हटाएको छ । पार्किङ प्रयोजनका लागि निर्माण गरिएको बेसमेन्टमा बैंकले अवैध रुपमा शाखा कार्यालय विस्तार गरेको भन्दै महानगर हटाउने निर्देशन दिएको थियो । सोही अनुसार बैंकले बेसमेन्टमा सञ्चालन गर्दै आएको शाखा हटाएको हो ।

बैंकको सो शाखा हटाउनका लागि एक साता अघि निर्देशन दिएको महानगरले आइतबार अनुगमन गर्दा शाखा हटेर बेंकले बेसमेन्ट खाली गरेको मेयर बालेन्द्र शाहको सचिवालयले जानकारी दिएको छ । बैंकले पनि मेयर बालेन्द्र शाहको निर्देशनलाई मान्दै शाखा हटाएको जानकारी दिएको छ । त्यस्तै महानगरपालिकाले अघि सारेको योजना स्वागतयोग्य रहेको बताउँदै बैंकले मेयर शाहको अभियानमा नैतिक समर्थन रहेको समेत जनाएको छ ।

त्यस्तै सोमबार नै वसन्तपुरस्थित सुरज आर्केडको संरचनाहरू पनि हटाइएको छ । बिरा कम्प्लेक्समा पनि बेसमेन्ट पार्किङ गर्नुपर्ने स्थानमा पसलहरू सञ्चालन गरेको भन्दै हटाउन निर्देशन दिइएको छ ।