काठमाडौं । गत आर्थिक वर्षमा नेपाल एसबिआई बैंकको खुद नाफामा उल्लेख्य रुपमा बढोत्तरी भएको छ । गत वर्ष बैंकले कुल १ अर्ब ६३ करोड ८२ लाख रुपैयाँ खुद नाफा कमाएको छ । जुन अघिल्लो वर्षको तुलनामा ७०.०४ प्रतिशत बढी हो । अघिल्लो वर्षमा बैंकले ९६ करोड ३४ लाख रुपैयाँ खुद नाफा कमाएको थियो ।
बैंकले प्रकाशित गरेको अपरिष्कृत वित्तीय विवरण अनुसार गतवर्ष बैंकको खुद ब्याज आम्दानी ५३.७२ प्रतिशतले बढेको छ । बैंकको खुद फि तथा कमिसन आन्दानीमा पनि २१.०५ प्रतिशतले वृद्धि भएको छ । त्यस्तै बैंकको कुल संचालन आम्दानी ३९.८३ प्रतिशतले बढेको छ भने संचालन मुनाफा ७५.०१ प्रतिशतले बढेको छ ।
गतवर्ष बैंकको खुद नाफामा वृद्धि भएसँगै प्रतिसेयर आम्दानीमा पनि वृद्धि भएको छ । आर्थिक वर्षको अन्त्यसम्ममा बैंकको ईपिएस ६ रुपैयाँ ५२ पैसाले बढेर १६ रुपैयाँ ६७ पैसा पुगेको छ । बैंकको मूल्य आम्दानी अनुपात १६.९३ गुणा रहेको छ भने प्रतिसेयर नेथवर्थ १७४ रुपैयाँ ३५ पैसा रहेको छ ।
त्यस्तै समीक्षा अवधिमा बैंकको चुक्ता पूँजी ३.५० प्रतिशत बढेको छ भने जगेडा कोष २३.३५ प्रतिशत बढेको छ। त्यसैगरी, बैंकको निक्षेप १२.६८ प्रतिशत र कर्जा ८.५८ प्रतिशत बढेको छ । खुद ब्याज आम्दानी र सञ्चालन मुनाफा बढेसँगै बैंकको नाफा बढ्न पुगेको बैंकको प्रक्षेपण रहेको छ ।
