काठमाडौं । गैरकानुनी धन्दा चलाउने ब्रोकर कम्पनीमाथि धितोपत्र बोर्ड ‘एक्सन’मा उत्रिएको छ । धितोपत्र नियमावली विपरित मनपरी गरेको भन्दै ब्रोकर नम्बर १३ अर्थात थ्राईभ ब्रोकरेज हाउस कार्वाहीमा परेको छ । बोर्डको अनुमतिबिना शाखा स्थापना गरेको भन्दै नेपाल धितोपत्र बोर्डले थ्राइभ ब्रोकरेज हाउसलाई ५० हजार रुपैयाँ जरिवाना गरेको हो ।
ब्रोकरले धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ को नियम ४० को उपनियम (१) विपरित काम गरेको ठहर गर्दै बोर्डले जरिवाना गरेको हो । बोर्डका अनुसार थ्राइभ ब्रोकरेज हाउसलाई धितोपत्र सम्बन्धी ऐन, २०६३ को दफा १०१ को उपदफा (६) बमोजिम नलिइ तनहुँ जिल्ला स्थित व्यास नगरपालिका–२, दमौलीमा शाखा कार्यालय खोलेपछि बोर्डले जरिवाना गरिएको छ ।
‘धितोपत्र दलाल र धितोपत्र व्यापारीले बोर्डको स्वीकृति लिई शाखा कार्यालय खोल्न सक्नेछ’– धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ को नियम ४० को उपनियम (१) मा भनिएको छ । यसरी बोर्डको स्विकृतिबिनै ब्रोकरले मनोमानी गर्दै शाखा विस्तार गरेको भन्दै कार्वाही गरिएको बोर्डले जनाएको छ ।
उक्त ब्रोकरले उल्लेखित नियमावलीको उक्त व्यवस्था अनुरुप शाखा कार्यालय खोल्न बोर्डबाट स्वीकृति नलिएको हुँदा जरिवाना गरिएको बोर्डले जनाएको छ ।
