काठमाडौं । घरमा डोजर चल्ने डरले काठमाडौं महानगरपालिकामा घरधनीहरु अवैध संरचना आफै हटाउन थालेका छन् । नियमविपरित बनाइएका संरचना भत्काउन काठमाडौं महानगरपालिकाको डोजर गोंगबु बसपार्क एरियामा पुगेपछि घरधनीहरु आफै संरचना हटाउन थालेका हुन् ।
सोमबार गोंगबु बसपार्क क्षेत्रका अधिकांश ठाउँमा डोजर ‘स्ट्याण्डबाई’ थियो भने, घरधनीहरु संरचना हटाउन धमाधम लागिरहेका थिए । ‘डोजरले नै भत्काउने हो भने संरचना काम नलाग्ने गरी ध्वस्त हुन्छ’, एक स्थानीयले भने, ‘त्यो भन्दा आफैले संरचना हटाउँदा क्षति पनि कम हुन्छ र सो संरचना पुनः प्रयोग गर्न समेत काम लाग्छ ।’ स्थानीयले डोजरको क्षति कम गर्नकै लागि कवाडी संकलन गर्ने व्यक्तिलाई लगाएर संरचना हटाएका हुन् ।
‘जसरी, जे गरेपनि आखिर अवैध संरचना भत्किने नै हो । अटेर गरे पनि बालेनले कसैलाई टेर्दैनन् । डोजर लगाएरै भएपनिअवैध संरचना भत्काएरै छोड्छन् ।’ एक स्थानीयले अर्थ सरोकारसँग भने -‘डोजरको क्षति सहन गाह्रो हुन्छ । बरु, आफै हटाए कमसेकम क्षतिको भार त कम हुन्छ । त्यसैले आफै लागेर फुटपाथमा परेको ट्रस्ट हटाउन लागेको छु ।’
आइतबार कोटेश्वरमा गैरकानुनी रुपमा निर्माण भएका संरचना भत्काएको महानगर सोमबार गोंगबु बसपार्क पुगेको थियो । अवैध संरचना हटाउने अभियानमा निरन्तर लागि परेको महानगरपालिकालाई पछिल्लो समय स्थानीयले पनि साथ दिन थालेका छन् ।
