काठमाडौं । वाणिज्य बैंकहरुको निक्षेप संकलनमा सुधार देखिएको छ । नेपाल बैंकर्स संघका अनुसार असोज महिनाको पहिलो सातासम्म वाणिज्य बैंकहरुको कुल निक्षेप ४५ खर्ब १२ अर्ब रुपैयाँ रहेको छ । जुन अघिल्लो साता अर्थात भदौ ३१ गतेसम्मको तुलनामा २६ अर्ब रुपैयाँले धेरै हो । अघिल्लो साता वाणिज्य बैंकहरुसँग ४४ खर्ब ८६ अर्ब रुपैयाँ निक्षेप रहेको थियो ।
यस्तै, कर्जा लगानीमा पनि केही सुधार देखिएको छ । एक सातामा कर्जा लगानी ४ अर्ब रुपैयाँले विस्तार भएर असोज ७ गतेसम्म ४१ खर्ब ९४ अर्ब रुपैयाँ कायम भएको छ । अघिल्लो साता भने वाणिज्य बैंकहरुको कर्जा लगानी ४१ खर्ब ९० अर्ब रुपैयाँ रहेको थियो । असोज ७ गतेसम्म वाणिज्य बैंकहरुको औसत कर्जा निक्षेप अनुपात (सीडी रेसियो) ८७.२१ प्रतिशत रहेको छ ।
