काठमाडौं । महोत्तरीदेखि झापासम्मका दर्जनौ व्यक्तिलाई मिटरब्याजको भुमरीमा हालेर उठिबास लगाउने महोत्तरीका महोत्तरी जिल्ला अदालतले मिटरब्याजी अनिरूद्ध साहलाई पूर्पक्षका लागि जेल चलान गरेको छ । सोझा साझा किसानलाई मिटरब्याजको दलदलमा फसाउने र घरबारबिहीन बनाउने साहलाई कारागार चलान गरिएको हो ।
साहमाथि ऋण दिएकै कारण कतिपय महिलालाई यौन शोषण समेत गरेको आरोप लागेको छ । भङ्गाहा नगरपालिका- ५ बस्ने ४० वर्षीय अनिरूद्धलाई बुधबार अबेर साँझ महोत्तरी जिल्ला अदालतका न्यायाधीश हेमबहादुर सेनको इजलासले पुर्पक्षका लागि जेल चलान गरेको हो ।
महोत्तरी जिल्ला अदालतका स्रेस्तेदार मदनप्रसाद जयसवालका अनुसार अनिरूद्धले थुप्रै मानिससँग अवैध रूपमा ब्याज असुली गरेको, धेरैलाई उठिबास लगाएको र ब्याजकै कारण धेरैलाई घरबारबिहीन बनाएकोसम्बन्धी पर्याप्त सबुत प्रमाण अदालतमा पेस भएकाले उनलाई न्यायाधीश सेनले पुर्पक्षमै राखेर मुद्दा अगाडि बढाउने आदेश दिएका हुन् ।
अनिरूद्धलाई ठगी, आपराधिक विश्वासघात, लिखतसम्बन्धी कसुर तथा संगठित अपराध मुद्दामा प्रहरीले भदौ ४ गते पक्राउ गरेको थियो । उनलाई पुर्पक्षका लागि जेल पठाउने आदेश भएपछि जलेश्वर कारागारमा पठाइएको छ ।
