काठमाडौं । राष्ट्रिय परिचयपत्र तथा पञ्जिकरण विभागमा सिस्टम डाउन हुँदा तीन दिनदेखि परिचयपत्र पाउन सकस भएको गुनासो बढ्न थाल्यो । नागरिकको गुनसो दिनहुँ बढ्न थालेपछि मंगलबार अर्थ सरोकारको टिम केशरमहलस्थित राष्ट्रिय परिचयपत्र तथा पञ्जिकरण विभागमा पुग्यो । त्यहाँ पुग्दा सेवाग्राहीका सास्ती छताछुल्ल थिए । कोही बच्चा बोकेर पालो कुर्दै थिए भने कोही रातीदेखिको निन्द्रा बिसाउन वेटिङ पेटीमै निदाएका थिए ।
सिस्टम बनाउने भन्दै केही कर्मचारी बाहिर झुण्डिएका तार टक्टक्याउँदै थिए । तर, तीनदेखि बिग्रिएको सिस्टम कहिले बन्ने हो ? भन्ने सवालमा स्वयम विभागकै कर्मचारी अनविज्ञ थिए । हामीले त्यहाँका नागरिकसँग पनि यथार्थ बुझ्ने प्रयास गर्यौं । र हामीले नागरिकका समस्या जस्ताको त्यस्तै कार्यालयका रुजु अधिकारी चन्द्रमणी ओझा समक्ष राख्यौँ । उनले सिस्टममा समस्या आएको स्विकारर्दै सुधारका लागि प्रयत्न गरिरहेका थिए । अर्थ सरोकारसँग कुराकानी गर्दै उनले भनेका थिए -‘टेक्निसियनले काम गर्दैछन् । आज सिस्टमको समस्या समाधान गरेर साँझ ६ बजेसम्म बसेर भएपनि परिचयपत्र बाँड्छौँ ।’
नभन्दै त्यसको केही समयमा विभागको सिस्टममा देखिएको समस्या समाधान भयो र परिचयपत्र वितरणको काम सुरु भयो । ‘तीन दिनदेखि समाधान नभएको समस्या मिडिया आएपछि हल भयो । हामीले सहज रुपमा परिचयपत्र पायौँ, कुनै झण्झटबिनै फटाफट काम भयो’, राजेश न्यौपानेले भने, ‘उहाँहरुले साँझसम्मे बसेर काम गर्नुभयो । मेरो लाईनमै १५० जना हुनुहुन्थ्यो, मंगलबारमात्रै २०० टोकन बाँडेको थियो । साँझसम्म सबैले सहज रुपमा परिचयपत्र पाउनुभयो ।’ यो सँगै बुधबार पनि विभागबाट सहज रुपमा परिचयपत्र वितरणको काम भईरहेको छ ।
यस्तो थियो राष्ट्रिय परिचयपत्र तथा पञ्जिकरण विभागमा अर्थ सरोकारको छड्केः
