काठमाडौं । लगागतारको बढ्दो इन्धनको खपतले अमेरिकामा इन्धनको अभाव देखिन थालेको छ । अमेरिकामा डिजेलको अभाव लगातार बढ्दै गएको भन्दै अमेरिकी इन्धन कम्पनीहरुले आगामी ६ महिनाभित्र अभावले चरम सिमा पार गर्ने चेतावनी दिएका छन् ।

यसो त पछिल्लो समय अमेरिकामा इन्धनको खपत अत्याधिक बढ्दो छ । स्थिति यही अवस्थामा चल्ने हो र अर्थव्यवस्थासँगै इन्धनको प्रयोग सुस्त नभए आगामी ६ महिनाभित्रै अमेरिकामा डिजेलको अभावले सिमा पार गर्ने अमेरिकाको सूचना प्रशासन (इआईए)ले जनाएको छ । इआईएका अनुसार डिजेलको अभाव देखिन थालेसँगै अमेरिकामा चर्को मूल्य वृद्धि पनि देखा पर्नेछ ।

गत साता अमेरिकामा डिजेल र अन्य डिस्टिलेट इन्धनको भण्डारण १० करोड ६० लाख ब्यारेल रहेको इआईएले जनाएको छ । जुन सन् १९८२ पछिको सबैभन्दा कम हो । जुलाईको अन्त्यसम्ममा अमेरिकामा ३० दिनलाई पुग्ने डिजेलको भण्डारण भएको भएपनि अक्टोबरसम्म आईपुग्दा भण्डारण क्षमता झन कमजोर बनेको छ ।

अब अक्टोबर महिनामा डिजेलको भण्डारण केवल २५ दिनको माग मात्र धान्न पुग्ने अवस्थामा रहेको इआईएले जनाएको छ ।

विशेषगरी, मेरील्याण्ड, भर्जिनिया, अलाबामा, जर्जिया, टेनेसी, नर्थ क्यारोलिना, साउथ क्यारोलिनालगायत अमेरिकका दक्षिणपूर्वी राज्यहरु डिजेल अभावबाट बढी प्रभावित बन्ने देखिएको छ । गोल्डम्यान स्याक्सका अनुसार रिफाइनरी बन्द हुनु र रिफाइनिङ क्षमतामा कम लगानी हुनुले अहिलेको डिजेल अभाव सृजना गरेकोे छ ।