काठमाडौं । जुवा खेलेको आरोपमा काठमाडौंको एक रिसोर्टबाट करिब ४ लाख नगदसहित प्रहरीले १८ जनालाई पक्राउ गरेको छ । तिहारको समयमा नागार्जुन नगरपालिका ७ स्विजरल्यान्डपार्क नजिकै रहेको दहचोक सिटी भ्यू रिसोर्टबाट उनीहरुलाई पक्राउ गरिएको हो ।

प्रहरीले उनीहरुलाई बिहीबार राती ८ बजे पक्राउ गरेको हो । ‘जुवा र कौडा खेलेको भन्ने सूचनाका आधारमा छापा मार्दा उनीहरुलाई फेला पारेका हौँ’, जिल्ला प्रहरी परिसर काठमाडौंका प्रहरी उपरिक्षक (एसपी) दिनेशराज मैनालीले भने, ‘नगदसहित १८ जनालाई पक्राउ गरी थप अनुसन्धान भइरहेको छ ।’

पक्राउ परेका उनीहरुबाट ३ लाख ८२ हजार ५९५ रुपैयाँ बरामद भएको छ । यस्तै १५ बुक तास र १६ थान कौडा पनि बरामद भएको प्रहरीले जनाएको छ । उनीहरूमाथि प्रहरी वृत्त स्वयम्भूबाट थप अनुसन्धान भइरहेको छ ।