काठमाडौं । काठमाडौं महानगरपालिकाले दर्ताबिनै सञ्चालन भएका व्यवसाय दर्ता गर्न अल्टिमेटम जारी गरेको छ । मंगलबार ३० दिने अल्टिमेटम जारी गर्दै महानगरले दर्ता नभएका व्यवसाय तत्काल दर्ता गर्न निर्देशन दिएको हो ।
सङ्घीय सरकार र प्रदेश सरकारबाट इजाजत लिएका व्यवसाय समेत महानगरभित्र दर्ता नभएको पाइएको महानगरले जनाएको छ । यस्ता व्यवसाय आगमी ३० दिनभित्र दर्ता गर्न र नगरेमा आर्थिक ऐन अनुसार कार्वाही गर्ने समेत महानगरपालिकाले चेतावनी दिएको छ ।
‘महानगरपालिकाको अनुगमनका क्रममा व्यवसाय दर्ता नगरी व्यापार, व्यवसाय गरेको पाइएमा काठमाडौं महानगरपालिका राजस्व ऐन, २०७५ को दफा ३४ को उपदफा (ग) बमोजिम व्यवसाय बन्द गरी नियमानुसार जरिवाना समेत असुल गरिनेछ’ -महानगरले जारी गरेको सूचनामा उल्लेख गरिएको छ ।
यो सँगै सूचना अटेर गरेर समयावधिभित्र व्यवसाय दर्ता नगरेमा हानगरको आर्थिक ऐन २०७९ को अनुसूची ७ को बुँदा नं. ३ बमोजिम आर्थिक वर्ष २०७२/०७३ लाई आधार वर्षका रुपमा लिई व्यवसाय कर असुली गरिने महानगरले जनाएको छ ।
