काठमाडौं । नेकपा माओवादी केन्द्रले अनौपचारिक रूपमा सार्वजनिक यातायातको क्षेत्रमा काम गर्दै आएका टुटल, पठाओ, इनड्राइभ लगायतलाई कानुनी मान्यता दिने घोषणा गरेको छ । माओवादीले चुनाव लक्षित आफ्नो प्रतिबद्धतापत्र सार्वजनिक गर्दै यसरी राइडिङ सेयर गर्ने सेवालाई वैधानिकता दिएर नियमन गर्ने जनाएको छ ।
नेकपा माओवादीको प्रतिबद्धतापत्रमा काठमाडौं उपत्यकाभित्र कम्तीमा ५०० विद्युतीय बस संचालन गर्ने एजेण्डा समेत उल्लेख गरिएको छ । त्यस्तै, प्रदेश तथा पालिकाहरुका प्रमुख सहरमा विद्युतीय यातायात संचालनको व्यवस्था गर्ने विषयसमेत घोषणापत्रमा समावेश गरिएको छ ।
त्यस्तै, माओवादीले विद्युतीय सवारी साधनलाई प्रबर्द्धन गर्न विशेष सहुलियत र अनुदान प्रदान गर्ने, प्रदेशका प्रमुख राजमार्ग र सहरहरूमा विद्युतीय चार्जिङ स्टेसनहरूको निर्माण गरिने समेत जनाएको छ ।
यो सँगै नेकपा माओवादी केन्द्रले सामूहिक उद्यमशीलताको विकास गर्न १० जनाभन्दा बढी युवा मिलेर उद्यम स्थापना गरे कुल लगानीको ५० प्रतिशतसम्म सहभागिता तथा अनुदानको व्यवस्था गर्ने विषयमा प्रतिबद्धता पत्रमा उल्लेख गरेको छ ।
त्यस्तै, वैदेशिक रोजगारीबाट फर्केका युवाको सञ्जाल निर्माण गरी उनीहरूलाई सामूहिक तथा निजी उद्यम स्थापना गर्न उद्योग–व्यवसायलाई बिउ पूँजी, ब्याज अनुदान, बीमा प्रिमियममा छुट तथा प्राविधिक सहयोग उपलब्ध गराइने प्रतिबद्धतापत्रमा समावेश गरिएको छ ।
