काठमाडौं । रवि लामिछाने नेतृत्वको राष्ट्रिय स्वतन्त्र पार्टीको चितवन जिल्ला कार्यालयमा आगलागी भएको छ । शुक्रबार राती भरतपुर ११ भोजाडस्थित कुमारीचोकमा रहेको जिल्ला कार्यालयमा आगो लागेको हो ।

प्रहरीका अनुसार आगलागीबाट कार्यालयभित्र रहेका फर्निचर जलेका छन् । ‘आगलागी हुँदा कुनैपनि मानवीय क्षति भएको छैन’, चितवनका प्रहरी प्रमुख एसपी नवराज अधिकारीले भने, ‘तर, कार्यालयमा रहेका प्लाष्टिकका कुर्सी, साइन बोर्ड लगायतका सामानमा क्षति भएको छ ।’

कार्यालयको ढोका चाबी यथावत रहेको र भित्र केही सामान जलेको पाईएको जिल्ला प्रहरी कार्यालय चितवनले जनाएको छ ।

एसपी अधिकारीका अनुसार घटनाको बारेमा ढिलो गरी प्रहरीमा जानकारी आएको थियो । पार्टीको सम्पर्क कार्यालय भएकोले ठूलो क्षति नभएको र घटनाबारे थप अनुसन्धान चलिरहेको एसपी अधिकारीले बताएका छन् ।