काठमाडौं । शिवम् सिमेन्ट्स लिमिटेडले चालु आर्थिक वर्षको पहिलो त्रैमाससम्ममा ३१ प्रतिशत बढी नाफा आर्जन गरेको छ । गतवर्षको तुलनामा ३१.९४ प्रतिशत बढी नाफा आर्जन गरेको कम्पनीको खुद नाफा २७ करोड ४७ लाख रुपैयाँ रहेको छ ।

कम्पनीको सञ्चालन आम्दानी घटेपनि अन्य आम्दानी बढेको र खर्च नियन्त्रण गरेका कारण कम्पनीको नाफा बढ्न पुगेको हो ।

कम्पनीले सार्वजनिक गरेको वित्तीय विवरण अनुसार समिक्षा अवधिमा कम्पनीको सञ्चालन आम्दानी ३०.४६ प्रतिशत घटेको छ । त्यस्तै कम्पनीको अन्य आम्दानी भने ३ हजार २४८.४३ प्रतिशत बढेको छ । गत वर्षको पहिलो त्रैमासमा ९३ लाख रुपैयाँ रहेको कम्पनीको अन्य आम्दानी चालु आर्थिक वर्षको सोही अवधिमा ३१ करोड ३४ लाख रुपैयाँ पुगेको छ ।

पहिलो त्रैमाससम्ममा कम्पनीको खुद नाफा बढेको भए पछि दोस्रो त्रैमाससमा नाफा बढाउनका लागि कम्पनीले सञ्चालन आम्दानीमा वृद्धि गर्नुपर्ने देखिन्छ ।

त्यस्तै चालु आर्थिक वर्षको पहिलो त्रैमासमा कम्पनीको ईपीएस ६ रुपैयाँ ५ पैसा बढेर २४ रुपैयाँ ९८ पैसा पुगेको छ । सो अवधिसम्ममा कम्पनीको प्रतिशेयर नेटवर्थ २१६ रुपैयाँ ९ पैसा रहेको छ भने मूल्य आम्दानी अनुपात २५.६८ गुणा रहेको छ ।