काठमाडौं । नेकपा एमालेले सबै प्रकारका सामाजिक सुरक्षा भत्ता बढाउने घोषणा गरेको छ । आसन्न प्रदेश तथा प्रतिनिधि सभाको निर्वाचनलाई लक्षित गर्दै नेकपा एमालेले सार्वजनिक गरेको घोषणापत्रमा सो कुरा उल्लेख गरिएको छ ।
सामाजिक सुरक्षा भत्ता देशको आर्थिक वृद्धिका आधारमा मात्रै हुनेछ । यसो त एमालेले यसभन्दा अघि वृद्धभत्ता मासिक ५ हजार पुर्याउने घोषणा गरेको थियो । हाल मासिक चार हजार रुपैयाँ वृद्धभत्ता दिने गरिएको छ ।
एमालेले सार्वजनिक गरेको घोषणापत्रमा गर्भावस्थामा पोषण र स्वास्थ्य परिक्षण, बाल्यावस्थामा बालसंरक्षण अनुदान, विद्यालय उमेरमा निःशुल्क शिक्षा र दिवा खाजा, वयस्क उमेरमा कामको ग्यारेन्टी र न्यूनतम ज्याला तथा वृद्ध अवस्थामा सामाजिक सुरक्षा भत्ताको प्रबन्ध गरी प्रत्येक नागरिकलाई गर्भावस्थादेखि वृद्धावस्थासम्म राज्यद्धारा सुरक्षा दिईने उल्लेख गरिएको छ ।
त्यस्तै, ज्येष्ठ नागरिक, दलित, एकल महिला, अपाङ्गता भएका व्यक्ति, लोपोन्मुख जाति तथा लक्षित वर्ग र क्षेत्रका बालबालिका गरी पाँच वर्षमा ६० लाखले सामाजिक सुरक्षा भत्ता पाउने घोषणापत्रमा उल्लेख गरिएको छ । आगामी पाँच वर्षमा १५ हजार रहेको न्यूनतम ज्याला मासिक २५ हजार पुर्याउने समेत एमालेको संकल्पमा समावेश गरिएको छ ।
