काठमाडौं । ट्वीटर किनेसँगै एलन मस्कले विश्वकै सर्वाधिक धनी व्यक्तिको ‘ट्याग’ गुमाएका छन् । ‘रियल टाईम बिलिनियरस्’ को सूची अनुसार मस्कलाई पछि पार्दै फ्रान्सका बर्नार्ड अर्नाल्ट विश्वकै धनी व्यक्ति बनेका हुन् ।

मस्कले पछिल्लो समय आफ्नो इलेक्ट्रिक कार कम्पनी ‘टेस्ला’को सेयर लगातार बेचिरहेका छन् । मस्कले तीन दिनमा मात्रै ‘टेस्ला’को करिब २२ मिलियन अर्थात करिब ३.६ बिलियन डलर मूल्य बराबरको सेयर बेचिसकेका छन् । ‘मैले आफ्नो व्यापार बचाउनका लागि ‘टेस्ला’को सेयर बिक्री गरेको हुँ ।’ – मस्कले भनेका छन् । योसँगै यस वर्ष टेस्लाको सेयर ६० प्रतिशतभन्दा धेरैले घटिसकेको छ ।

यसो त मस्कले ४४ बिलियन डलरमा ट्वीटर किनेसँगै उनको नेटवर्थमा पनि निरन्तर गिरावट देखिएको छ । कुनै समय ३४० बिलियन डलरका मालिक रहेका एलन मस्कको नेटवर्थ पछिल्लो समय घटेर १६३.७ अर्ब डलरमा झरेको छ ।

त्यस्तै, हाल विश्वकै धनी व्यक्ति बनेका बर्नार्ड अर्नाल्टको सम्पत्ती १८१.८ अर्ब डलर रहेको छ । ‘रियल टाइम बिलिनियरस्’ को सूचीमा तेस्रो नम्बरमा रहेका भारतमा गौतम अडानीको भने कुल नेटवर्थ १३१.३ अर्ब डलर रहेको छ ।