काठमाडौं । प्राइम लाइफ इन्स्योरेन्सको १५औं वार्षिक साधारणसभा हुने भएको छ । इन्स्योरेन्सको साधारणसभा पुस २४ गते अग्रवाल भवन, कमलपोखरी, काठमाडौंमा दिउँसो २ बजेबाट सुरु हुने भएको हो । कम्पनीको मंसिर २७ गते बसेको संचालक समितिको बैठकले साधारणसभा बस्ने निर्णय गरेको हो ।
सभामा कम्पनीले सेयरधनीहरुलाई गत वर्षको नाफाबाट १३ प्रतिशत बोनस सेयर र ०.६८ प्रतिशत नगद लाभांश गरी कुल १३.६८ प्रतिशत लाभांश वितरण गर्ने प्रस्ताव पेश गर्ने भएको छ । साथै, सभामा संस्थापक र सर्वसाधारण समुहको सेयर लगानी अनुपात ७१ प्रतिशत र ४९ प्रतिशत कायम गर्ने प्रस्ताव पनि पेश हुनेछ ।
यस्तै, सभाले मर्जर समितिबाट पेश भएको यूनियन लाइफ र गुँरास लाइफसँग मर्जर सम्बन्धि प्रारम्भिक सम्झौता पत्रको मस्यौदा स्वीकृत गर्ने भएको छ । सभामा आर्थिक वर्ष २०७७/७८ को वार्षिक प्रतिवेदन, नाफा/नोक्सान तथा नगद प्रवाह विषयमा पनि छलफल हुने भएको छ ।
त्यस्तै, आर्थिक वर्ष २०७८/७९ का लागि लेखापरीक्षक नियुक्ति गर्ने र निजको पारिश्रमिक निर्धारण गर्ने अर्को एजेण्डा पनि छ । सभा प्रयोजनका लागि इन्स्योरेन्सले पुस ८ गते बुक क्लोज गर्ने जनाएको छ । तसर्थ, पुस ७ गतेसम्म कायम रहने सेयरधनीले मात्र सभामा भाग लिन सक्नेछन् । हाल प्राइम लाइफको सेयर कारोबार रोक्का रहेको छ ।
प्राइम लाइफ, युनियन लाइफ र गुराँस लाइफ इन्स्योरेन्स एक आपसमा गाभिने भएपछि यसको सेयर कारोबार रोक्का रहेको छ । यी ३ कम्पनीले वैशाख २९ गते मर्जर सम्बन्धी सहमतिपत्रमा हस्ताक्षर गरेका थिए ।
