काठमाडौं । कतार पठाइदिन्छु भन्दै रकम ठगी गर्ने व्यक्ति पक्राउ परेका छन् । जिल्ला झापा धुलाबारी नगरपालिका वडा. नं. १० सुगामटोल स्थाई घर भई हाल काठमाडौंको किर्तिपुरमा बस्ने ३२ वर्षीय हेमसागर भण्डारी पक्राउ परेका हुन् ।
भण्डारीले वैदेशिक रोजगारीका लागि कतार पठाइदिने र प्रतिष्ठित कम्पनीमा जागिर लगाइदिने प्रलोभनमा परी रकम ठगी गरेको प्रहरीले जनाएको छ । उनले पटक-पटक गरी पिडितहरुबाट १ लाख ७२ हजार रुपैयाँ ठगी गरी सम्पर्क बिहिन भएका थिए ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले भण्डारीलाई पुस १७ गते काठमाडौंको नयाँबानेश्वरबाट पक्राउ गरेको हो । पक्राउ परेका उनलाई थप अनुसन्धान तथा कारवाहीका लागी वैदेशिक रोजगार विभाग, बुद्धनगर काठमाडौं पठाएको प्रहरीले जनाएको छ ।
