काठमाडौं । एलिट क्यापिटल लिमिटेडको प्रथम साधारणसभा सम्पन्न भएको छ । शुक्रबार शंकर होटल लाजिम्पाटमा सम्पन्न भएको साधारणसभाले नयाँ सञ्चालक समिती समेत निर्विरोध चयन गरेको छ ।
सभाले दिनेश आचार्यको अध्यक्षतामा सञ्चालक समितिको नयाँ नेतृत्वमा चयन गरेको जनाएको छ । नवनिर्वाचित सञ्चालकहरू बोधप्रसाद त्रिपाठी, राजन लम्साल र कुमार पौडेल रहेका छन् । गत वर्ष स्थापना भएको सो सस्था सेयर बजारका सक्रिय लगानीकर्ताको सहकार्यमा गैरआवासिय नेपालीको लगानीमा सञ्चालित छ ।
मर्चेन्ट बैंकरको रूपमा कारोबार सुरू गर्ने तयारी गरिरहेको उक्त क्यापिटललाई नेपाल धितोपत्र बोर्डले सञ्चालनका लागि सैद्धान्तिक सहमती (एलओआई)दिइसकेको छ ।
उक्त क्यापिटलले लगानी व्यवस्थापन, कर्पोरेट एडभाइजरी, अन्डरराइटिङ र डिपी खाता सञ्चालन सेवा प्रदान गर्ने तयारी गरिरहेको छ । वाणिज्य बैंकहरूको मर्जरका कारण पछिल्लो समय आधा दर्जन बढी मर्चेन्ट बैंकर घटिसकेको छ ।
मर्चेन्ट बैंकरको संख्या घटिरहेको बेला सेयर मार्केटका चर्चित लगानीकर्ताहरुको पहलमा स्थापित यस संस्थाले बजारमा नयाँ योगदान दिने कुरामा विश्वास गर्न सकिन्छ ।
