काठमाडौं । विमान दुर्घटनामा ज्यान गुमाएका पाइलट कमल केसीको अर्धकदको शालिक निर्माण गरिने भएको छ । आइतबार पोखरामा यति एयरको नाइन एन एएनसी एटिआर ७२–५०० विमान दुर्घटना हुँदा ज्यान गुमाएका पाइलट केसीको शालिक निर्माण गरिने भएको हो ।
कास्की जिल्लाको रुपा गाउँपालिकाले पाइलट केसीको स्मरणमा शालिकसहित उद्यान निर्माण गरी शिलालेखमा दुर्घटनामा निधन भएका ७२ जनाको नाम समावेश गर्ने निर्णय गरको हो । स्व. केसी रुपा गाउँपालिकाको पहिलो पाइलट एवम् प्रशिक्षक हुन् । उनलाई यसअघि गाउँपालिकाले रुपरत्न सम्मानबाट समेत सम्मान गरेको थियो ।
मंगलबार बसेको गाउँ कार्यपालिका बैठकले केसीको शालिकसहित उद्यान निर्माण गर्ने, शिलालेखमा मृतक सबैको नाम समावेश गर्ने र स्थानीय पाठ्यपुस्तकमा केसीका बारेमा समावेश गराउने समेत निर्णय गरेको गाउँपालिका अध्यक्ष नवराज ओझाले जानकारी दिएका छन् ।
यही माघ १ गते काठमाडौंबाट पोखरा आउँदै गरेको यती एयरलाइन्सको जहाज पोखरा विमानस्थल नजिक सेती नदीको खोँचमा दुर्घटना हुँदा ७२ जनाको निधन भएको छ। दुर्घटनामा परेकाहरूमध्ये अझै एक जनाको शव प्राप्त हुनसकेको छैन।
