काठमाडौं । तपाईलाई आफ्नो बुवासँग रिस उठ्यो भने के गर्नुहुन्छ ? सबैको साझा र सटिक जवाफ हुन्छ- ‘केही दिन बोल्दिन वा केही समयका लागि घरबाट टाढा जान्छु ।’ तर, जर्मनीमा ३७ वर्षीय एक युवकले बुवासँग रिस उठेपछि पुख्र्यैली महल बेचिदिएका छन् ।
जर्मनीको पूर्व राजपरिवारका सन्तानसमेत रहेका अर्नस्ट अगस्ट जुनियरले आफ्नो बुवासँग रिस उठेपछि सन् १८६७ मा निर्माण भएको ‘मेरिनबर्ग महल’ बेचिदिएका हुन् । उनले बुवासँगको रिसले १३५ कोठासहितको सो महल जम्मा १ सय ४० रुपैयाँमा बेचेका हुन् । जर्मनीको हनोवर सहरका राजकुमार अर्नस्ट अगस्टले ‘मेरिनबर्ग महल’ सन् २००० मा उनका छोरा अर्नस्ट अगस्ट जुनियरलाई दिएका थिए ।
सन् २०१८ मा ‘मेरिनबर्ग महल’ उचित मूल्यमा सरकारलाई बेच्ने घोषणा गरेका अगस्ट जुनियरले बुवासँग रिस उठेपछि १ युरोमै सो महल बेचिदिएका हुन् । यद्यपी उनले महलको मर्मतका लागि २७ मिलियन युरो लाग्ने र त्यति धेरै पैसा आफूसँग नभएकाले ‘मेरिनबर्ग महल’ १ युरोमा बेचेको बताएका छन् । १ युरोमै पुख्र्यौली महल बेचेपछि ६६ वर्षका अर्नस्ट अगस्टले आफ्नै छोरा विरुद्ध अदालतमा मुद्धा हालेका छन् ।
द आर्ट न्युजपेपरका अनुसार अहिले अर्नस्ट अगस्ट सो महल फिर्ता गर्न कानुनको साहरा लिँदैछन् । योसँगै उनले आफ्नो छोरा विरुद्ध थुप्रै गम्भिर आरोप समेत लगाएका छन् ।
आफ्नो छोराकै कारण अस्ट्रियाको एक लजमा बस्न बाध्य भएको बताउँदै अर्नस्ट अगस्टले बिरामी हुँदासमेत आर्थिक सहायता नपाएको बताएका छन् । राजकुमार अर्नस्ट अगस्ट नोवर राजवंशका हुन् । उनी महारानी एलिजाबेथको काकातर्फका भाई पर्छन् ।
