बिराटनगर । केहि समय अगाडी अब्दुल खताबले आफ्नो नाममा पक्राउ पूर्जी जारी भएको थाहा पाए । उनलाई मान्छे अपहरण गरेर शरीर बन्धक बनाइएको आरोप लागेको रहेछ । सोहि दिन केहि संचारमाध्यममा उनीविरुद्ध अपहरण केसमा किटानी जाहेरी परेको खबर पढे उनले । मान्छे अपहरण गरेको, र बलजफ्ती १५ लाख फिरौती लिएर छोडेको आरोप उनलाई छ । तर खास कुराचाहिं के छ भने, उनलाई अपहरणको आरोप लगाउने व्यक्ति अरु कोहि नभएर, उनकै पार्टनर हुन् । उनका पार्टनर व्यवसायी पनि हुन् । बिराटनगरमा चलेको नेपाल टाइम्स नामक मिडियामा पैसा हालेर सेयर लिएका उनले नै आफ्नो अपहरण भएको भन्दै प्रहरीमा किटानी जाहेरी दिएका हुन् ।

सानो उमेरमै मिडिया संचालकका रुपमा सफल भएका व्यक्ति हुन् खताब । केहि बर्ष अघि मात्र उनले सुरु गरेको नेपाल टाइम्स अहिले देशमा मात्र होइन, विदेशमा पनि लोकप्रिय छ । नेपालमा अनलाइनमा पनि टेलिभिजन हुन्छ र ? वा अनलाइन टेलिभिजन पनि हुन्छ र ? भन्ने स्थितिमा उनले ‘अनलाइन टेलिभिजन भनेको यस्तो हुन्छ’ भनेर देखाईदिएका थिए । अहिले पनि नेपाल टाइम्सको टप ५० बुलेटिन, नेपाल टाइम्स ट्रेण्डिङ लगायत सो मिडियाले उत्पादन तथा प्रशारण गर्ने भिडियो रिपोर्टहरु दिनमै लाखौँले हेर्छन् । देश विदेशमा उनको मिडियाको चर्चा एकदम धेरै छ ।

चर्चा बढेसँगै उनको मिडियामा लगानी गर्न इच्छुकहरु पनि बढे । यहि क्रममा जोडिएका व्यवसायी थिए- अरुणकुमार राठी । राठीका प्रोडक्टहरु पनि नेपाल टाइम्समा प्रमोट गर्ने र राठीले हालेको पैसा अनुसार सेयर दिने सम्झौता अनुसार भएको थियो । करिब २ वर्ष अगाडी नेपाल टाइम्स मिडिया प्रालिको २० प्रतिशत शेयर २० लाख रुपैयाँमा खरिद गरेका थिए ।

तर बीचमा खताव र राठीबीच सम्बन्धमा केहि दरार आएको थियो । खाताबका अनुसार राठीले नेपाल टाइम किन्ने अफर गरेका थिए । ‘कि किनिदिन्छु, कि सकिदिन्छु भन्नुभएपछि, मैले पनि पूरै किन्न पनि दिन्न सक्न त झन् दिंदै दिन्न’ भनेको थिएँ । त्यसपछि म विरुद्ध अनेक षड्यन्त्र भए ।’ खताबको तर्क छ ।

सम्बन्धमा दरार आएपछि दुई पार्टनरबीचको सम्बन्धमा समस्या देखियो । तर पैसाको हिसाब त मिलाउनु पर्ने नै थियो । जुन दिन अपहरण गरियो भनेर राठीले किटानी जाहेरी दिएका छन्, सो दिन खताव र राठीबीच भेट भएको छ । भेटमा उनीहरुबीच केहि छलफल र केहि भनाभन पनि भएको छ । राठीले १५ लाखको चेक नेपाल टाइम्स मिडिया प्रालिका नाममा काटेका छन्, जसमा उनी स्वयम् सेयरहोल्डर छन् । तर त्यहि १५ लाख रुपैयाँ खताबले फिरौती मागेको भन्दै राठीले प्रहरीमा किटानी जाहेरी दिए । जाहेरीपछि खताबविरुद्ध पक्राउ पूर्जी जारी भयो । उनको मुद्धा अहिले अधिवक्ता स्वागत नेपालसहितको टिमले लडिरहेको छ । र उनी भनिरहेका छन् -‘पार्टनरशीपमा समस्या आएकै हो । मैले उहाँ स्वयम् पनि सेयरहोल्डर भएको कम्पनीका नाममा चेक लिएकै हो । तर मैले कसरी मान्छे अपहरण गर्न सक्छु ? मेरो पार्टनरसँगको आन्तरिक विवाद कसरी अपहरण हुन सक्छ ? पार्टनरशिपमा समस्या आउँदा अपहरणको बात लगाइयो ।’

तर अपहरण भएको जाहेरी परेपछि प्रहरीले उनलाई पक्राउपूर्जी जारी गर्यो । उनलाई पक्राउ पूर्जी जारी गरेपछि उनी कानुन व्यवसायीहरुको राय लिन थाले । त्यतिकैमा उनी फरार भनेर केहि संचारमाध्यममा समाचार आयो । त्यसपछि उनी कानुन व्यवसायीहरुको सल्लाहमा आफैं प्रहरीसमक्ष उपस्थित भए । अहिले उनी थुनामा छन् । यहि बेला कुनैबेला कसैले आरोप लगाएकै भरमा थुनामा परेका रवि लामिछाने गृहमन्त्री छन् । यो समाचार तयार गर्दासम्म उनी थुनामा परेको १७ दिन भयो । हिरासतमा पुगेकासँग उनी भन्छन्- ‘केहि गल्ती नगर्दा पनि अनेक बात लगाएर मलाई फसाईयो ।’

यता राठीको आरोप भने अर्कै छ । मङ्सिर १३ गते मंगलबार साँझ खताबले आफुलाई फोन गरेर भिडियो बनाउन भन्दै प्रस्ताव गरेको, र आफ्नै पार्टनरबाट प्रस्ताव आएकाले स्वीकार गरी भोलिपल्ट बुधबार भिडियो खिच्न भनेर जाँदा उनलाई अपहरण गरिएको आरोप उनको छ । सो दिन भिडियो शुट पनि भयो । विभिन्न ठाउँमा भिडियो खिचेपछि आफुलाई खताबले दाम्लोले बाँधेर बार्गेनिङ्ग गरेको उनको तर्क छ । विभिन्न मिडियामा पनि उनले आफुलाई बाँधेर पैसा मागिएको र आफुले चेक दिएको तर्क उनको छ ।

ग्लोबल आईएमई बैंकमा रहेको उनको चेक भोलिपल्ट साटिएको छ ।

तर घटना भएको भनिएको ३ दिनपछि उनले प्रहरीमा आफुलाई खताबले अपहरण गरेको भन्दै किटानी जाहेरी दिए । उनले सोहि विवरण विभिन्न उद्योग संगठनहरुमा पनि पठाए । डाक्टरले २१ दिनसम्म आराम गर्नु भनेको भन्दै उनी अहिले आराम गरिरहेका छन् । मोरङ व्यापार संघ, उद्योग संगठन मोरङ र नेपाल उद्योग परिसंघ प्रदेश नम्बर १ लाई राठीले पत्र पठाएरै आफू पीडित भएको गुनासो गरेका छन् । नेपाल उद्योग परिसंघ प्रदेश नम्बर १ ले अनुसन्धानका लागि अनुरोधसमेत गरेको छ ।

प्रहरीले प्रारम्भिक अनुसन्धान सक्काएको छ । र अव थुनछेक बहस हुनेछ । नेपाल टाइम्स मिडियाकै नाममा चेक काटिएको देखिएकोले सो आन्तरिक कारोबार भएको र फिरौती नभएको दाबी खताब पक्षका वकिलले गर्नेछन् भने राठीका पक्षका वकिलले अपहरणको दाबी गर्नेछन् । तर यतिबेला प्रहरीकै अनुसन्धानमाथि खताबले चिन्ता व्यक्त गरेका छन् । ‘जसरी पनि नेपाल टाइम्स सिध्याउँछु भनेर व्यापारीहरु लागेपछि मेरो एक्लै के जोड लाग्छ र ! त्यसमाथि म भित्र छु । प्रहरीले गरेको अनुसन्धानमाथि नै मलाई शंका छ । तर अदालतले सबै कुरा बुझ्छ र म निर्दोष सावित हुन्छु भन्ने विश्वास पनि छ मलाई ।’ पंतिकारसँगको हिरासतकै भेटमा उनले भने – ‘यस्तै केसमा फस्नुभएको रविदाई अहिले गृहमन्त्री हुनुहुन्छ । उहाँले यो कुरा स्पष्ट बुझ्नुहुन्छ । एउटा मिडियाकर्मी थुनामा राखेर बाहिर प्रहरीले गर्ने सम्भावित चलखेलका बारेमा पनि उहाँ अनुभवी हुनुहुन्छ । प्रहरीको अनुसन्धान तथष्ट भए म निर्दोष सावित हुनेमा कुनै शंका छैन ।’