काठमाडौं । काडमाडौंको बानेश्वरस्थित संसद भवनअघि आफ्नै शरिरमा आगो लगाएर आत्मदाह गरेका प्रेमप्रसाद आचार्यको मृत्यु प्रकरणमा प्रहरीले भाटभटेनीका सञ्चालकसँग बयान लिएको छ ।

मर्नुअघि प्रेमले ‘आत्महत्या’ गर्नुको कारण उल्लेख गर्दै सामाजिक सञ्जाल फेसबुकमा ‘स्टाटस’ सार्वजनिक गरेका थिए । सोही स्टाटसमा उल्लेख गरिएका विभिन्न व्यक्तिहरुसँग प्रहरीले हाल सोधपुछ जारी राखेको छ । सोही क्रममा प्रहरीले सोमबार भाटभटेनी सुपर मार्केटका सञ्चालक मीनबहादुर गुरुङसँग सोधपुछ गरेको हो ।

यसअघि मृतक प्रेमको परिवारले सोही स्टाटसको आधारमा ११ जना व्यक्ति तथा संस्थाविरुद्ध जाहेरी दर्ता गरेका थिए । सोही जाहेरी र ‘फेसबुक स्टाटस’का आधारमा अनुसन्धान गरिरहेको प्रहरीले जनाएको छ ।

जाहेरीका आधारमा प्रहरीले ‘आत्महत्या दुरुत्साहन मुद्धा’मा अनुसन्धान गरिरहेको छ । अनुसन्धान सकिएपछि प्रहरीले आफ्नो अनुसन्धान सरकारी वकिलको कार्यालयमा पेस गर्ने छ। अनुसन्धान गर्दै जाँदा कतिपय व्यक्ति पक्राउ गर्नुपर्ने वा नपर्ने खुल्दै जाने प्रहरीले बताएको छ।