काठमाडौं । फागुनमा विकास बैंकहरुले निक्षेपको ब्याज घटाउने भएका छन् । शुक्रबार बसेको विकास बैंक एशोशियसनको बैठकले फागुन महिनामा निक्षेपको ब्याजदर ०.२५ प्रतिशतले घटाउने निर्णय गरेको हो ।

योसँगै अब फागुन १ गतेदेखि विकास बैंकहरुले व्यक्तिगततर्फ अधिकतम ११.७५ प्रतिशत ब्याज दिनेछन् भने संस्थागत मुद्धती निक्षेपमा भने ९.७५ प्रतिशत ब्याज दिने भएका छन् ।

त्यस्तै, रेमिट्यान्स खातामा भने १२.७५ प्रतिशत ब्याजदर दिने निर्णय भएको एशोशियसनका एक सदस्यले बताएका छन् ।

तर, वाणिज्य बैंकहरुले भने फागुनमा निक्षेपको ब्याज यथवत् राख्ने निर्णय गरेका छन् । बिहीबार बसेको नेपाल बैंकर्स संघको बैठकले फागुनमा पनि मागकै ब्याजदर कायम राख्ने निर्णय गरेका हुन् ।