काठमाडौं । सीवाईसी लघुवित्तमा निष्क्रिय कर्जा अस्वभाविक बढ्दा लघुवित्तको नाफामा भारी गिरावट आएको छ । चालु आर्थिक वर्षको दोस्रो त्रैमाससम्मको वित्तीय विवरण सार्वजनिक गर्दै लघुवित्तले खुद नाफामा ५८.९७ प्रतिशत कमी आएको जनाएको छ ।

गत वर्षको सोही अवधिमा लघुवित्तले ५ करोड ८१ लाख रुपैयाँ खुद नाफा आर्जन गरेको थियो । तर, चालु आर्थिक वर्षको लघुवित्तको सो नाफा घटेर २ करोड ३८ लाख ६५ हजार रुपैयाँमा सिमित भएको छ ।

समिक्षा अवधिमा लघुवित्तको खराब कर्जा २.७० प्रतिशतबाट बढेर ४.६२ प्रतिशत पुगेको छ । योसँगै लघुवित्तको खुद ब्याज आम्दानी १६.७३ प्रतिशतले बढेर १२ करोड १४ लाख ९४ हजार रुपैयाँ पुगेको छ ।

नाफासँगै सिवाईसी लघुवित्तको प्रतिसेयर आम्दानीमा पनि भारी गिरावट आएको छ । समिक्षा अवधिसम्ममा १०२ रुपैयाँ ४४ पैसा रहेको लघुवित्तको ईपीइस ६३ रुपैयाँ २ पैसाले घटेर ३९ रुपैयाँ २४ पैसा कायम भएको छ । त्यस्तै, लघुवित्तको प्रतिसेयर नेटवर्थ भने ३३३ रुपैयाँ ४३ पैसा रहेको छ ।