काठमाडौं । जीवन विकास लघुवित्त वित्तीय संस्थाले चालु आर्थिक वर्षको दोस्रो त्रैमासको वित्तिय विवरण सार्वजनिक गरेको छ । लघुवित्तले दोश्रो त्रैमाससम्ममा २६ करोड ४७ लाख ८८ हजार रुपैयाँ खुद नाफा आर्जन गरेको छ । जुन खुद नाफा अघिल्लो वर्षको तुलनामा ३७.२५ प्रतिशतले थोरै हो ।
गत वर्षको सोहि अवधिमा कम्पनीले ४२ करोड १९ लाख ५१ हजार रुपैयाँ खुद नाफा आर्जन गरेको थियो । लघुवित्तको खुद ब्याज आम्दानी ४.८७ प्रतिशतले घटेर ७९ करोड ४५ लाख १० हजार रुपैयाँ पुगेको छ । यस्तै, खराब कर्जा बढेका कारण इम्पेयरमेन्ट चार्जमा पनि उल्लेख्य वृद्धि भएपछि जीवन विकासको नाफामा प्रत्यक्ष असर परेको देखिएको छ ।
इम्पेयरमेन्ट चर्ज बढेका कारण सञ्चालन नाफा पनि ३७.२५ प्रतिशतले घटेर ३७ करोड ८२ लाख ६९ हजार रुपैयाँमा सीमित भएको छ । खराब कर्जा ०.७५ प्रतिशतले बढेर २.८३ प्रतिशत पुगेको छ । जीवन विकासको चुक्ता पुँजी १ अर्ब ३ करोड ४२ लाख ८० हजार रुपैयाँ छ भने जगेडा कोषमा ८५ करोड २८ लाख रुपैयाँ जम्मा भएको छ ।
कम्पनीको खुद नाफा घटेका कारण प्रतिसेयर आम्दानी पनि प्रभावित भएको छ । पुस मसान्तसम्म आइपुग्दा प्रतिसेयर आम्दानी ८७ रुपैयाँ ८१ पैसाले घटेर ५१ रुपैयाँ २० पैसामा सीमित भएको छ । जीवन विकासको प्रतिसेयर नेटवर्थ २९४ रुपैयाँ ६९ पैसा रहेको छ ।
