काठमाडौं । काठमाडौं उपत्यकामा सरकारले जग्गा कित्ताकाट खुला गरेको छ । जग्गा वर्गीकरणको काम सकिएकोले उपत्यकाका काठमाडौं, भक्तपुर र ललिपुर गरी तीनै जिल्लामा जग्गा कित्ताकाट खुला गरिएको हो ।
तीनै जिल्लामा कृषि र गैरकृषि जग्गााको वर्गिकरण सकिएकोले कृषि जग्गाको लागि कित्ताकाट खुलेको भूमि व्यवस्था तथा अभिलेख विभागले जनाएको छ । विभागका अनुसार गैर कृषि जग्गाको कित्ताकाट भने अन्य विधामा वर्गीकरण गरिसकेपछि मात्रै खुल्नेछ ।
२०७९ जेठ २३ गतेदेखि भू-उपयोग नियमावली लागू भएपछि जग्गा व्यवस्थापन नयाँ ऐन-नियममा निर्देशित भएको छ । हाल स्थानीय तहहरुले कृषि, आवासीय, व्यावसायिक, औद्योगिक, खानी तथा खनिज, वन गरी विभिन्न विधामा जग्गा वर्गीकरण गर्ने काम धमाधम गरिरहेका छन् ।
विभागको तथ्यांकअनुसार काठमाडौं जिल्लाका काठमाडौं महानगरपालिका, कागेश्वरी मनोहरा नगरपालिका, कीर्तिपुर, गोकर्णेश्वर, चन्द्रागिरी, टोखा, तारकेश्वर, दक्षिणकाली, नागार्जुन, शंखरापुर र बुढानीलकण्ठ गरी ११ वटै पालिकाले वर्गीकरण सकिसकेका छन् । त्यस्तै, भक्तपुर जिल्लामा भक्तपुर नगरपालिका, सूर्यविनायक नगरपालिका, मध्यपुरथिमि, चाँगुनारायण नगरपालिका गरी चार वटा पालिका छन्।
ललितपुर जिल्लामा ललितपुर महानगरपालिका, महालक्ष्मी नगरपालिका, गोदावरी, बागमती गाउँपालिका, माहांकाल गाउँपालिका, कोन्जयोसोम गाउँपालिका गरी ६ वटा स्थानीय तह छन् ।
