काठमाडौं । आर्थिक मिडिया सञ्चालक संघ नेपाल (इमान)का उपाध्यक्ष माधव प्रसाद तिवारी इन्जा वौद्धिक अनुसन्धानवृत्ति पुरस्कारबाट सम्मानित भएका छन् । नेपाली पत्रकारहरुको अन्तराष्ट्रिय सञ्जाल (इन्जा)ले हरेक वर्ष प्रदान गर्दै आएको सो पुरस्कारबाट यसवर्ष तिवारी सम्मानित भएका हुन् ।
स्वर्गीय शुकदेव शाहको स्मृतिमा स्थापना भएको उक्त बौद्धिक अनुसन्धानवृत्ति पुरस्कारबाट इन्जाले पत्रकारिता तथा आम सञ्चार विषयमा त्रिभुवन विश्वविद्यालयबाट दर्शनार्चाय-विद्यावारिधी (एमफिल-पिएचडी) गर्दै गरेका माधवप्रसाद तिवारीलाई सम्मान गरेको हो । तिवारीलाई बुधबार आयोजित विशेष समारोहकाबीच सभामुख देबराज घिमिरेले पुरस्कार हस्तान्तरण गरेका छन् ।
बौद्धिक अनुसन्धानवृत्तिबाट सम्मानित हुने तिवारीले २०५७ सालबाट पत्रकारिता शुरु गरेका थिए । भित्ते पत्रिकाबाट पत्रकारिता शुरु गरेका तिवारीले रुपरेखा साप्ताहिक, माउन्टेन टीभी, अनलाइनखबर डटकम, ककनी पोष्ट साप्ताहिक, विज एफएम, आजको न्युज डटकम र हाल दैनिकी डटकमको प्रधानसम्पादकको रुपमा कार्यरत छन् ।
