काठमाडौँ । रुरु जलविद्युत आयोजनाले चिनियाँ कम्पनीलाई दिएको ठेक्का रद्ध गरेर २३५ मेगावाट को हुम्ला कर्णाली-१ र ३३५ मेगावाटको हुम्ला कर्णाली-२ जलविद्युत आयोजनाको अध्ययन अघि बढाउने भएको छ । चिनियाँ कम्पनीले काम गर्न नसकेपछि सो आयोजनाको संचालक समितिले चिनियाँ कम्पनीसँग ठेक्का तोडेको हो । ठेक्का तोडेर कम्पनीले हुम्ला कर्णाली-१ र हुम्ला कर्णाली-२ जलविद्युत आयोजनाको अध्ययन अघि बढाउने निर्णय गरेको छ । हुम्ला कर्णाली-१ र हुम्ला कर्णाली-२ जलविद्युत आयोजनाको सर्वे लाइसेन्स २०७४ चैत २९ गते चिनियाँ कम्पनीले पाएको थियो ।
चिनियाँ कम्पनीले नेपालका विभिन्न जलविद्युत आयोजनाको लाइसेन्स लिने तर काम नै नगरी हात झिक्ने गरेको पाइएको अवस्थामा रुरुको यो निर्णयलाई अर्थपूर्ण रुपमा हेरिएको छ । ‘सुरुमा लाइसेन्स लिन हानथाप गर्ने, तर पछि अनेक बहानामा सो आयोजनामा लगानी गर्न नसकिने भन्दै हात झिक्ने क्रमलाई चिनियाँ कम्पनीले ‘बानी’जस्तै रहेछ । हाम्रो काम लिएको कम्पनीले पनि अहिले सो आयोजना अघि नबढ्ने बताएपछि हामीले सो आयोजनालाई टेकओभर गर्ने निर्णय गरेका हौँ ।’ रुरुका एक संचालकले अर्थ सरोकारसँग भने- ‘नेपालको चीनसँग पूर्वाधार सम्झौता छैन भने विद्युत व्यापार सम्झौता पनि छैन । चिनियाँ कम्पनीलाई लाइसेन्स दिनु नै गलत भएछ ।’
उनका अनुसार बर्षौंसम्म लाइसेन्स होल्ड गर्ने चिनियाँ कम्पनीले परिणाम भने दिने गरेका छैनन् । ‘बर्षौंसम्म लाइसेन्स होल्ड, हातमा लाग्यो सून्यजस्तै हुने गरेको छ । जुन काम गरेरै सक्छौँ भन्नेका लागि दुखद् विषय हो ।’
यो आयोजनाको पूर्ववत ठेक्का चिनियाँ कम्पनी सिचुवान वाङपिङ इनर्जीले लिएको थियो । तर सो कम्पनीले योजना अघि बधाउन नसक्ने भएको भन्दै बोर्डले निर्णय नै गरेर सो ठेक्का टेकओभर गरी थप अध्ययन अघि बढाउने निर्णय गरेको हो ।
चिनियाँ कम्पनीले किन र के कारणले सो आयोजना अघि नबढाएको भन्ने विषयमा यकिन केहि नबोले पनि अहिलेको परिस्थितिमा लगानी गर्न नसक्ने भन्दै हात झिकेको पाइएको छ ।
