काठमाडौं । अर्थशास्त्री स्वर्णिम वाग्लेले नेपाली कांग्रेस छोडेका छन् । बिहीबार नेपाली कांग्रेसका नेता डा. शेखर कोइरालालाई पत्र लेख्दै उनले पार्टी परित्याग गरेको जानकारी दिएका हुन् ।
राष्ट्रिय स्वतन्त्र पार्टीले तनहुँ १ मा उपनिर्वाचनका लागि टिकट दिएसँगै वाग्लेले कांग्रेस छाडेका हुन् । टिकटको लोभमा पार्टी छोडेपछि कांग्रेसका कार्यकर्ताले उनलाई चरम अवसरवादी भएको आरोप लगाउन थालेका छन् । यता राष्ट्रिय स्वतन्त्र पार्टीका शुभचिन्तकहरुले भने स्वर्णिम आउने खबरले आफुहरुलाई उत्साहित बनाएको टिप्पणी गरिरहेका छन् ।
पार्टी छोडेको आधिकारिक घोषणा गर्दै वाग्लेले आफू नेपाली कांग्रेसमा बस्न सक्ने स्थिति नै नभएको बताएका छन् । त्यस्तै, उनले आफ्नो उमेर, ज्ञान र उर्जा रहँदै ‘डेलिभरी’को प्रयोगमा जान चाहेको बताएका छन् ।
‘हजुरहरुको अपार सद्भावका बावजूद म कांग्रेसमा रहन नसक्ने अवस्था आएको छ। देउवा/आरजु गिरोहको निरन्तर हेपाई र अपमानले यो स्थिति ल्याएको हो । अब कुरेर बस्ने कृपा र निगाहको जीवनपर्यन्त राजनीतिभन्दा समयसीमा तोकेर आफ्नो उमेर, ज्ञान र ऊर्जा सान्दर्भिक रहँदै ‘डेलिभरी’को प्रयोगमा जान चाहेँ । यो निर्णय लिनुअघि हजुरहरुसँग भेटेको भए निश्चय पनि कांग्रेस नछोड्न भन्नुहुने र त्यसपछि छोड्दा अवज्ञा गरेको हुने भएकोले श्रद्धापूर्वक पछि नै हामी बस्नेछौँ । काँग्रेस पार्टीमा हजुरहरुको निर्णायक हैसियत बनेको दिन फेरि हामी कुनै न कुनै रुपमा जोडिन सक्ने आशा छ। त्यतिन्जेल जहाँजहाँ रहन्छौँ, त्यहींबाट सहकार्य र सहयोग गर्ने र अहिलेको आत्मीय मित्रता कायम राख्ने वाचा गर्दछु ।’- वाग्लेले कांग्रेस नेता कोइरालाई लेखेको पत्रमा उल्लेख गरिएको छ ।
