काठमाडौं । ईटाली दक्षिण कोरिया लगायतका देशहरूमा पठाईदिन्छु भन्दै रकम ठगी गर्ने व्यक्ति पक्राउ परेका छन् । जिल्ला कालीकोट सान्नी त्रिवेणी गाउँपालिका वडा नं.५ स्थाई घर भई हाल गोंगबु बस्ने २८ वर्षीय सुधन कुमार शाही र जिल्ला सोलुखुम्बु सोलु दुधकुण्ड न.पा. वडा नं.१ स्थाई घर भई हाल टोखा बस्ने ३१ वर्षीय अनिल श्रेष्ठ पक्राउ परेका हुन् ।
शाहीले बिपिन खत्री सहित २२ जनालाई वैदेशिक रोजगारीको लागि ईटाली, दक्षिण कोरिया, न्युजिल्याण्ड तथा पोर्चुगल लगायतको देशहरूमा पठाईदिन्छु र सम्बन्धित देशहरूमा पुगेपछि प्रतिष्ठित कम्पनीमा काममा लगाईदिने साथै मासिक १ लाख रुपैयाँ भन्दा बढी कमाई हुन्छ भनी पिडितहरूलाई विश्वास दिलाई प्रलोभनमा पारी रकम ठगी गरेको प्रहरीले जनाएको छ ।
उनले सम्बन्धित देशहरुमा जानका लागी प्रतिव्यक्ति ५ लाख मात्रै लाग्ने भन्दै पिडितहरुबाट पटक पटक गरी ६६ लाख ३७ हजार ठगी गरी सम्पर्क बिहिन भएको प्रहरीले जनाएको छ । पिडितहरूबाट जाहेरी दरखास्त परेपछि प्रारम्भिक अनुसन्धान लगत्तै खोजतलास गर्ने क्रममा काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले चैत्र ३० गते साँझ ५ बजे काठमाडौंको सिनामंगलबाट पक्राउ गरेको हो । पक्राउ परेका उनीहरुलाई थप अनुसन्धान तथा कारवाहीका लागि जिल्ला प्रहरी परिसर टेकु, काठमाडौँ पठाईएको प्रहरीले जनाएको छ ।
