काठमाडौं । नेकपा (एमाले)का अध्यक्ष केपी शर्मा ओलीले मुलुकको अर्थतन्त्र ओरालो लाग्नु चिन्ताको विषय भएको बताएका छन् ।

पछिल्लो समय मुलुकको अर्थतन्त्र ओरालो गतिमा रहेको दाबी गर्दै ओलीले अर्थतन्त्रलाई सकारात्मक बाटोमा फर्काउन आफ्नो दल लागिपरेको समेत बताएका छन् । ‘मुलुकको अर्थतन्त्र ओरालो लाग्नु चिन्ताजनक छ ।’, उनले भने, ‘देशलाई कसरी अनुकूल अवस्थामा फर्काउने, त्यसमा जनताको साथ कसरी लिने भनेर हामी लागेका छौँ ।’

नेकपा (एमाले) पाँचथरले फिदिममा आयोजना गरेको अगुवा कार्यकर्ता भेलालाई सम्बोधन गर्दै ओलीले अर्थमन्त्रीले ‘कर्मचारीलाई तलब खुवाउनै नसक्ने अवस्थामा त पुगेका छैनौँ’ भन्नु सामान्य कुरा नरहेको बताएका छन् ।

‘अर्थमन्त्रीले नै यसो भनेपछि अरु विकास निर्माणका कुरा त छाडिदिनुपर्ने स्थिति आएको बुझ्न सकिन्छ ।’, उनले भने, ‘ओरालो लागेको अर्थतन्त्रलाई कसरी सुधार गर्ने भन्ने हाम्रो मुख्य चिन्ता रहेको छ ।’