">
काठमाडौं । चालु आर्थिक वर्षको तेस्रो त्रैमासमा कृषि विकास बैंकको ‘पर्फमेन्स’ झनै फितलो देखिएको छ । बैंकले सार्वजनिक गरेको चालु आर्थिक वर्षको चैत्र मसान्तसम्मको अपरिस्कृत वित्तीय विवरणअनुसार बैंकको ‘पर्फमेन्स’ झनै खस्किएको देखिएको हो ।
बैंकले सार्वजनिक गरेको वित्तीय विवरण अनुसार चालु आर्थिक वर्षको तेस्रो त्रैमाससम्ममा कृषि विकास बैंकले १ अर्ब ४ करोड १० लाख ३७ हजार रुपैयाँ खुद नाफा कमाएको छ । जुन गत आर्थिक वर्षको सोही अवधिको तुलनामा ४५.३६ प्रतिशत कम हो । गत वर्ष सोही अवधिमा बैंकले १ अर्ब ९० करोड ५३ लाख रुपैयाँ रहेको खुद नाफा आर्जन गरेको थियो ।
समीक्षा अवधिमा कृषि विकास बैंकको खराब कर्जामा पनि अस्वभाविक वृद्धि देखिएको छ । बैंकले प्रकाशित गरेको विवरण अुनसार बैंकको खराब कर्जा २.३२ प्रतिशतबाट बढेर ४.३५ प्रतिशत पुगेको छ । जसका कारण बैंकको इम्पेयरमेन्ट चार्च २ अर्ब ११ करोड ६६ लाख रुपैयाँ पुगेको छ ।
चालु आर्थिक वर्षको चैत्र मसान्तसम्म बैंकको सञ्चालन नाफा पनि ४८.१५ प्रतिशतले घटेर १ अर्ब ४४ करोड ९९ लाख रुपैयाँमा सीमित भएको छ । त्यस्तै, सोही अवधिमा बैंकको निक्षेप संकलन ५१.०४ प्रतिशतले घट्दा कर्जा लगानी भने २.५५ प्रतिशतले बढेको छ ।
यता समीक्षा अवधिमा बैंकको वितरणयोग्य नाफा पनि ७९.६२ प्रतिशतले घटेर ५८ करोड ४३ लाख रुपैयाँमा सीमित भएको छ । नाफासँगै बैंकको प्रतिसेयर आम्दानी (ईपीएस) ८.५६ रुपैयाँले घटेर ७.९ रुपैयाँमा सिमित भएको छ । हाल बैंकको प्रतिसेयर नेटवर्थ २०१.४ रुपैयाँ रहेको छ ।
