काठमाडौं । नेपाल बिमा प्राधिकरणले दुई लघु बिमा कम्पनीलाई लाइसेन्स वितरण गर्ने भएको छ । मंगलबार बसेको प्राधिकरण सञ्चालक समितिको बैठकले पुनः दुई लघु बिमा कम्पनीलाई लाइसेन्स दिने निर्णय गरेको हो ।
प्राधिकरणका कार्यकारी निर्देशक राजुरमण पौडेलका अनुसार प्राधिकरणले प्रोटेक्टिभ माइक्रो र क्रेष्ट माइक्रो लाइफ इन्स्योरेन्सलाई लाइसेन्स दिन निर्णय गरेको हो ।
लघु बीमा कम्पनी सञ्चालनको सैद्धान्तिक सहमति पाएका ७ मध्ये हालसम्म ४ कम्पनीले मात्रै लाइसेन्स पाएको पौडेलले बताएका छन् । ‘आइतबार गार्डियन माइक्रो लाइफ इन्स्योरेन्स र नेपाल माइक्रो इन्स्योरेन्सलाई लाइसेन्स वितरण गर्ने निर्णय गरेको थियो ।’, उनले भने, ‘लघु बिमा कम्पनी सञ्चालनको सैद्धान्तिक सहमति पाएका ७ कम्पनी मध्ये ४ कम्पनीले मात्रै लाइसेन्स पाएका हुन् ।’
त्यस्तै, स्टार माइक्रो इन्स्योरेन्स, ट्रष्ट माइक्रो इन्स्योरेन्स र लिबर्टी माइक्रो लाइफ इन्स्योरेन्स कम्पनीले भने पुँजी बढाउन नसक्दा प्राधिकरणमा आवेदन नै दिएका छैनन् । प्राधिकरणले पुँजी पुर्याउन नसकेका लघु बिमा कम्पनीहरुलाई ४५ दिन समय थप गरेको छ ।
