काठमाडौं । नेकपा एमालेले फरार सांसद लक्ष्मी महत्तो कोइरीलाई उद्योग समितिमा सिफारिस गरेको छ । संघीय संसद सचिवालयमा बुझाएको विवरण अनुसार एमालेले संघीय संसदका ‘फरार सांसद’ कोइरीलाई उद्योग तथा वाणिज्य र श्रम तथा उपभोक्ता हित समितिमा सिफारिस गरको हो ।

एमालेले गरेको सिफारिसका आधारमा प्रतिनिधिसभा बैठकले कोइरीको नाम समितिमा अनुमोदन गर्नेछ । मधेस आन्दोलन-२ को क्रममा महोत्तरीमा कार्यरत असई थमन विकको हत्यामा संलग्न भएको भन्दै उनलाई सजाय सुनाएपछि कोइरी फरार रहेका छन् । तर, स्वास्थ्यको कारण देखाउँदै उनी संसद बैठकमा अनुपस्थित हुँदै आएका छन् ।

बिना जानकारी लगातार १० पटकसम्म बैठकमा अनुपस्थित भए सांसद पद स्वतः खारेज हुने भए पछि कोइरीले पत्र लेख्दै उपस्थित हुन नसक्ने जनाएका हुन् । कोइरीसमेत रहेको सो समितिमा रघुवीर महासेठ, शान्ति चौधरी, अमृतादेवी अग्रहरी, हेमराज राई, लालप्रसाद साँवा, रामशंकर यादव, मंगलप्रसाद गुप्ता रहेका छन् ।