काठमाडौं । वैदेशिक रोजगारीमा यूएईमा कार्यरत एक नेपालीले झण्डै ७० करोड रुपैयाँ भन्दा बढीको चिट्ठा हात पारेका छन् । यूएईमा ड्राइभरको रूपमा कार्यरत नेपाली नागरिक पदमले ‘महजुज राफल ड्र’ मार्फत २० मिलियन दिराम ७१ करोड बढीको चिट्ठा जितेका हुन् ।
पदमले चिट्ठाको पाँचवटै नम्बर मिलाएपछि कुल ७१ करोड ७७ लाख ८२ हजार ४ सय ९६ रुपैयाँ नेपाली बराबरको चिट्ठा जितेको अन्तराष्ट्रिय सञ्चार माध्यमले जनाएका छन् । अन्तराष्ट्रिय सञ्चार माध्यमका अनुसार उनले मिलाएको नम्बर ५, १०, ४१, ४६ र ४९ रहेको छ ।
पदम सन् २०२३ मा पाँचै नम्बर मिलाएर ठुलो चिट्ठा जित्ने पहिलो सहभागीसमेत बनेका छन् । पदमले यूएईमा गाडी चलाएर ५७ सय दिराम अर्थात् २ लाख रुपैयाँ बराबर प्रत्येक महिना कमाउँदै आएका छन् । उनी २३ वर्षदेखि यूएईमा एउटै कम्पनीमा काम गरिरहेका छन् ।
यसअघि पनि केही मात्रामा यस्तो चिट्ठा रकम जितेको भए पनि अहिलेको जस्तो ठूलो रकमको चिट्ठा जितेको यो पहिलो पटक रहेको पदमले बताएका छन् । ‘यसअघि पनि मैले यस्तो चिट्ठा जित्दै आएको थिएँ । तर यति ठूलो रकमको चिट्ठा जितेको भने पहिलो हो ।’, उनले भने, ‘चिट्ठा जितेको कुरामा विश्वास नै लागिरहेको छैन ।’
उनले पहिलो लक्की नम्बर आफ्नो श्रीमती र छोरीसँग सोधेर राखेको र त्यसपछिको अर्को नम्बर आफाले राखेको बताएका छन् । पदमले आफूले मेहनत गरेर कमाएको रकमबाट पनि विभिन्न असहाय र पीडित व्यक्तिहरूलाई सहयोग गरेको भन्दै अब झन् सहयोग गर्न आफूसँग पैसा भएको भन्दै खुसी व्यक्त गरेका छन् ।
