तनहुँ । तनहुँको सदरमुकाम दमौलीमा नेपाल एसबिआईबैंकको झुर सेवाका कारण पेन्सन लिने बृद्ध बाआमाहरु तनावमा परेका छन् । अव्यवस्थित लाइन, बैंकको निकै कमजोर सेवा र कर्मचारीको हेपाहा व्यवहारका कारण त्यहाँका स्थानीयहरु समस्यामा परेको गुनासो लाइनमा बसेकाहरुले गरेका छन् ।
लाइनमा बसेकाहरुले बैंकका कर्मचारीहरुले राम्रो व्यवहार नगरेको र बीचबीचमा आफ्ना मान्छे घुसाएर गलत काम गरिरहेकोसमेत आरोप लगाएका छन् ।
पेन्सन लिनका लागि कुपन लिन बैंक खुल्नुअघि नै वृद्ध बाआमाहरु लाइनमा बसेका छन् । तनहुँलगायत लमजुङ, गोर्खाका पेन्सनरले यहाँबाट पेन्सन लिने गरेका छन् ।
तनहुँको सदरमुकाम दमौलीमा नेपाल एसबिआई बैंकमा भारतीय भूतपुर्व सैनिक तथा उनीहरूका परिवार पेन्सन लिन लामबद्ध भीडले पनि बैंकको सेवामा ग्राहकले भोगिरहेको सास्तीलाई प्रष्ट हुनेगरी देखाएको छ ।
