काठमाडौं । आँखुखोला जलविद्युत कम्पनीले चालु आर्थिक वर्षको तेस्रो त्रैमासको वित्तिय विवरण सार्वजनिक गरेको छ । कम्पनीले तेश्रो त्रैमासमा ८६ लाख ५२ हजार रुपैयाँ खुद नाफा आर्जन गरेको छ । जुन खुद नाफा अघिल्लो वर्षको तुलनामा ७१.५९ प्रतिशतले घटेको हो ।

गत वर्ष कम्पनीले ३ करोड ४ लाख ५१ हजार रुपैयाँ नाफा आर्जन गरेको थियो । कम्पनीको विद्युत् बिक्रीबाट हुने आम्दानी घटेसँगै नाफामा असर परेको हो । आँखुखोलाले यो त्रैमासमा विद्युत बिक्रीबाट १५ करोड ४५ लाख रुपैयाँ मात्र आम्दानी गरेको छ । साथै, उत्पादन तथा वितरण खर्च पनि ३ करोड ४ लाख रुपैयाँबाट बढेर ३ करोड ९२ लाख रुपैयाँ पुगेपछि नाफा प्रभावित बनेको हो ।

हाल आँखुखोलाको चुक्ता पुँजी ८० करोड रुपैयाँ रहेको छ । जगेडा कोष भने २३ करोड रुपैयाँ ऋणात्मक छ । नाफा घटेपछि यसको प्रतिसेयर आम्दानी १ रुपैयाँ ४४ पैसा (वार्षिक) मा सीमित भएको छ भने प्रतिसेयर नेटवर्थ ७१ रुपैयाँ २५ पैसा रहेको छ ।