काठमाडौं । सानिमा बैंकले चालु आर्थिक वर्षको तेस्रो त्रैमाससम्मको अपरिस्कृत वित्तीय विवरण सार्वजनिक गरेको छ । बैंकले सार्वजनिक गरेको विवरण अनुसार चालु आर्थिक वर्षको चैत्र मसान्तसम्म बैंकको नाफामा सामान्य बढोत्तरी भएको छ ।
समीक्षा अवधिमा बैंकले १ अर्ब ७१ करोड १६ लाख १३ हजार रुपैयाँ खुद नाफा आर्जन गरेको छ । जुन गत आर्थिक वर्षको तुलनामा ७.४७ प्रतिशत बढी हो । बैंकले गत आर्थिक वर्षको समीक्षा अवधिमा १ अर्ब ५९ करोड २६ लाख २३ हजार रुपैयाँ खुद नाफा आर्जन गरेको थियो ।
त्यस्तै, समीक्षा अवधिमा बैंकको खुद ब्याज आम्दानी ४७.०९ प्रतिशतले बढेर ४ अर्ब ९३ करोड ८१ लाख ३० हजार रुपैयाँ पुगेको छ । सो अवधिमा बैंकको सञ्चालन नाफा भने ९.९९ प्रतिशतले मात्र बढेर २ अर्ब ४८ करोड ८ लाख ९१ हजार रुपैयाँ पुगेको छ ।
चालु आर्थिक वर्षको तेस्रो त्रैमाससम्ममा बैंकको खराब कर्जा ०.३८ प्रतिशतबाट बढेर २.२७ प्रतिशत पुगेको छ । चैत मसान्तसम्म आइपुग्दा वितरणयोग्य नाफा १ अर्ब २० करोड ४७ लाख ९५ हजार रुपैयाँ छ । समीक्षा अवधिमा बैंकको नाफामा सामान्य वृद्धि भए पनि प्रतिसेयर आम्दानी (ईपीएस) पनि ३७ पैसाले घटेर १८ रुपैयाँ ५० पैसा काम भएको छ । हाल सानिमाको प्रतिसेयर नेटवर्थ १४८ रुपैयाँ ३ पैसा छ ।
