काठमाडौं । नेपाल विद्युत् प्राधिकरणले सोना सिमेन्ट प्रालिको बिजुली काटेको छ । दाङमा रहेको सोना सिमेन्टले प्राधिकरणलाई बिजुली प्रयोगको करिब ७५ करोड रुपैयाँ बक्यौता नतिरेपछि लाइन काटिएको प्राधिकरण नेपालगञ्ज शाखाका प्रमुख हरि पाण्डेले जानकारी दिएका छन् ।
पाण्डेका अनुसार सिमेन्टले बिजुली प्रयोग गरेबापत प्राधिकरणलाई ७४ करोड ६० लाख रुपैयाँ बक्यौता तिर्न बाँकी छ । बक्यौता तिर्न पटक पटक ताकेता गरेपनि सम्पर्कमा नआएपछि लाइन काटेको पाण्डेले बताए ।
‘सोना सिमेन्टले तिर्नुपर्ने बक्यौता ठूलो छ । तिर्नका लागि पटक-पटक ताकेता पनि गरेका हौँ । तर, कोही सम्पर्कमा आएनन् ।’, उनले भने, ‘हदै भएपछि लाइन काट्न बाध्य भएका हौँ । सिमेन्टले पहिला लिएको डेडिकेटेड लाइनबाट ३२ करोड ९४ लाख तथा सो पछिको ४१ करोड ६६ लाख बक्यौता तिर्न बाँकी छ ।
सोनापुर मिनरल्स एन्ड वाइल प्रालिले दाङमा रहेको उद्योगबाट सोना र सोनापुर सिमेन्ट उत्पादन गर्दै आएको छ । प्राधिकरणको नेपालगञ्ज शाखाले दाङमा रहेको उद्योगको बिजुली काटेको हो । प्राधिकरणले २०७७ देखिको बक्यौताका तिर्न पटकपटक आग्रह गर्दा पनि उद्योगबाट कुनै सुनुवाइ नभएपछि लाइन काट्नुपरेको जनाएको छ । उद्योगले बिचमा केही तिर्ने गरेपनि विगत ९ महिनादेखि भने कुनै बक्यौता तिर्न नआएपछि लाइन काटेको प्राधिकरणले जनाएको छ ।
