">
काठमाडौं । चालु आर्थिक वर्षको तेस्रो त्रैमासमा स्ट्याण्डर्ड चार्टर्ड बैंकको ‘पर्फमेन्स’ आकर्षक देखिएको छ ।
बैंकले चालु आर्थिक वर्षको तेस्रो त्रैमाससम्म आइपुग्दा २ अर्ब ६१ करोड रुपैयाँ खुद नाफा आर्जन गरेको छ । जुन गत आर्थिक वर्षको तुलनामा ६०.२५ प्रतिशत बढी हो । बैंकले गत आर्थिक वर्षको समीक्षा अवधिमा १ अर्ब ६२ करोड ८७ लाख रुपैयाँ खुद नाफा कमाएको थियो ।
यता, चालु आर्थिक वर्षको चैत मसान्तसम्म स्ट्यान्डर्ड चार्टर्ड बैंकको वितरणयोग्य नाफा २ अर्ब ५६ करोड रुपैयाँ नाघेको छ ।
बैंकले सार्वजनिक गरेको वित्तीय विवरण अनुसार समीक्षा अवधिमा खुद ब्याज आम्दानी ७८.३६ प्रतिशतले बढेर ४ अर्ब ४० करोड ७२ लाख रुपैयाँ पुगेको छ । साथै, सञ्चालन नाफा ६०.२३% ले बढेर ३ अर्ब ७३ करोड ८० लाख रुपैयाँ पुगेपछि खुद नाफामा आकर्षक सुधार भएको हो ।
चालु आर्थिक वर्षको चैत्र मसान्तसम्म आइपुग्दा बैंकको खराब कर्जा सामन्य बढेको छ । समीक्षा अवधिमा बैंकको खराब कर्जा ०.३६ प्रतिशतबाट बढेर ०.९० प्रतिशत पुगेको छ । त्यस्तै, चालु आवको समीक्षा अवधिमा बैंकको नाफासँगै प्रतिसेयर आम्दानी (ईपीएस) पनि १३.८८ रुपैयाँले बढेर ३६.९१ रुपैयाँ पुगेको छ । हाल बैंकको प्रतिसेयर नेटवर्थ २०४.१८ रुपैयाँ रहेको छ ।
