काठमाडौं । प्रधानमन्त्री पुष्पकमल दाहाल (प्रचण्ड)ले आफूजस्तो प्रधानमन्त्री नेपालको इतिहासमा सितिमिति नभेटिने बताएका छन् । मंगलवार राष्ट्रिय सभाको बैठकलाई सम्बोधन गर्दै उनले यस्तो दाबी बताएका हुन् ।

पहिलो पटक आफ्नो तर्फबाट प्रधानमन्त्रीको हैसियतले राखेको विचारहरुलाई सबैले ऐतिहासिक भनेर उठेर हात मिलाएको प्रचण्डले दाबी गरे । यस्तो विचार नेपालको संसदीय इतिहासमा दुर्लभ भेटिने हुनाले यो कुरालाई ध्यान दिएर सरकारको नीति कार्यबारे धारणा बनाउन प्रचण्डले आग्रह गरेका छन् ।

‘अघिल्लो पटक सत्ता पक्ष र प्रतिपक्ष दुवैले समर्थन गरेको प्रधानमन्त्री हुँ । यस्तो प्रधानमन्त्री सितिमिति भेटिँदैन ।’, प्रधानमन्त्री प्रचण्डले भने, ‘नेपालको इतिहासमा मौलिकता भेटिएको छ । म शतप्रतिशत प्रतिनिधि सभाका सदस्यहरुको समर्थन गरेर बनेको प्रधानमन्त्री हुँ ।’

त्यस्तै, प्रधानमन्त्री दाहालले सरकारले ल्याएको नीति तथा कार्यक्रममा पक्ष र प्रतिपक्ष दुवै दलहरुको विचार धारणा समेटिएको हुनाले यसको विरोध गर्नुको सैद्धान्तिक धरातल र नैतिक धरातल नभएको बताएका छन् ।